بانکێک سزادرا و زیاتر لە 5 هەزار مووچەخۆر مووچەکانیان دەگوازرێتەوە 

SNN

بەهۆی خراپیی ئاستی خزمەتگوزارییەکانەوە، پڕۆژەی “هەژماری من” بڕیاری سزادانی بانکی بازرگانیی عێراق (TBI)ـی دا و بەشێک لە مووچەخۆرانی ئەو بانکەی گواستەوە.

گواستنەوەی مووچەخۆران

سەرچاوەیەک لە پڕۆژەی “هەژماری من” بە کەناڵ8ـی ڕاگەیاندووە، بەهۆی پێشکەشکردنی خراپترین جۆری خزمەتگوزاری لەلایەن بانکی (TBI)ـەوە، بڕیار دراوە زیاتر لە پێنج هەزار مووچەخۆری ئەو بانکە بگوازرێنەوە بۆ سەر بانکێکی دیکەی دڵخوازی خۆیان.

توانای سنووردار و داواکاریی زانکۆی سلێمانی

بەرپرسێک لە پڕۆژەی هەژماری من لە نووسینگەی مەسرور بارزانی، سەرۆکوەزیرانی هەرێمی کوردستان ئاماژەی بەوە داوە کە (TBI) بەردەوام خراپترین خزمەتگوزاریی لە پڕۆژەکەدا پێشکەش کردووە و لە توانایدا نییە ئەو ژمارە کەمەی هەژماری بانکی بەڕێوەببات، کە تاوەکو ئێستا تەنیا 31 هەزار مووچەخۆری خاوەن کارتی هەیە. بەهۆی ئەم گرفتانەوە، مووچەخۆرانی زانکۆی سلێمانی خۆیان پەیوەندییان بە تیمی هەژماری من کردووە و داوای گۆڕینی بانکەکەیان کردووە.

کێشەی دواکەوتنی مووچە و ئامێرەکان

لەگەڵ وەرگرتنی مووچەی مانگی 10ـی ساڵی 2025، مووچەخۆران لە سێ بانکی سەر بە هەژماری من مووچەکانیان دواکەوت، کە یەکێکیان بانکی (TBI) بوو. لەو ماوەیەدا فەرمانبەران ڕووبەڕووی کێشەی کەمیی ئامێرەکانی ڕاکێشانی پارە و نەبوونی پارەی پێویست لەنێو ئامێرەکان بوونەوە.

هۆشداری بۆ بانکەکانی دیکە

بەرپرسەکەی هەژماری من جەختی کردەوە کە ئەم ڕێکارە تەنیا بۆ (TBI) نییە، بەڵکو لەمەودوا هەر بانکێک کێشەی لە پێشکەشکردنی خزمەتگوزارییەکاندا هەبێت، ڕووبەڕووی هەنگاوی هاوشێوە و سزادان دەبێتەوە.