داهاتی نانەوتیی عێراق بۆ نزیکەی دوو هێندە زیادی کردووە

SNN

مەزهەر محەمەد ساڵح راوێژکاری سەرۆکوەزیرانی عێراق بۆ کاروباری دارایی رایگەیاند، داهاتی نانەوەتی لە ساڵی 2025 دا بەراورد لەگەڵ ساڵانی پێشوو بۆ نزیکەی دوو هێندە زیادی کردووە.

لە لێدوانێکدا بۆ رۆژنامەی سەباح مەزهەر محەمەد ساڵح ئاشکرای کردووە، ساڵی 2025 رێژەی داهاتی نانەوتی گەیشتووەتە 12٪ی کۆی بودجەی گشتی، ئەمەش لە کاتێکدایە ساڵی پێشووتر نزیکەی 7٪ی بودجەی پێکدەهێنا.

راوێژکارەکەی سەرۆکوەزیران هۆکاری ئەو هەڵکشانەی بۆ پلانی ستراتیژی و چاکسازییەکانی حکومەت گەڕاندووەتەوە بە تایبەتی لە رێگەی بە ئەلکترۆنیکردنی کەرتەکانی باج و گومرگ.

ئاماژەی بەوەشکرد، پلانی حکومەت بریتیە لەوەی لە رێگەی رێکخستنەوەی باج و گومرگ و فرەچەشنکردنی سەرچاوەکانی داهات، بودجەی گشتی لە تاک سەرچاوەیی بوون و پەیوەستبوون بە نەوت رزگار بکات و لە داهاتوویەکی بزیکدا داهاتی نانەوتی بگەیەنێتە ئاستێک کە یەک لە سەر پێنجی بودجەی گشتی پێکبهێنن.

هاوکات بە گوێرەی ئامارەکانی گومرگی عێراق ساڵی رابردوو کۆی داهاتی گومرگی وڵاتەکە گەیشتووەتە 2.53 ترلیۆن دینار.