کەی مووچەی مانگی یەک دێت؟

SNN

ئەندامێکی پێشووی پەرلەمانی عێراق رایدەگەیەنێت، بەغدا کێشەی نەختینەی نییە و پارەی مووچە ئامادەیە، دەڵێت “ئەگەرەکان بۆ ئەوەیە ئەمساڵ هیچ گرفتێک بۆ مووچە دروست نەبێت”.

شیروان میرزا، ئەندامی پێشووی پەرلەمانی عێراق لە لێدوانێکدا بۆ SNN رایگەیاندووە، بابەتی ئامادەکردنی بودجەی ساڵی 2026 دوادەکەوێت و بە بڕوای من لەمساڵدا یاسای بودجەی نابێت، لەگەڵ بەردەوامبوونی رێککەوتنەکە هەناردەی نەوت لە رێگەی سۆمۆوە و ناردنی داهاتی نانەوتی بابەتی مووچە وەک مانگەکانی تر بەردەوام دەبێت.

ئاماژەی بەوەکردووە، لەسەر داهاتی نانەوتی کەمێک کێشە هەیە بەغدا داوای زیاتر دەکات وهەرێم دەیەوێت کەمبکرێتەوە، بەڵام ئەوەش چارەسەر دەکرێت و رێکدەکەون.

ئاشکرایکردووە، هەموو ئەگەرەکان بۆ ئەوەیە ئەمساڵ هیچ گرفتێک بۆ مووچە دروست نەبێت، رێککەوتنەکەی هەرێم و بەغدا بۆ سێ مانگی تر درێژەی دەبێت و مووچە دێت.

لەبارەی بوونی کێشەی نەختینەوە شیروان میرزا روونیکردووەتەوە، بەغدا کێشەی نەختینەی نییە بەڵام ئەو پارە چاپکراوەی هەیە کەمترینی لە بانکەکانی حکومەتە زۆرینەی لای هاووڵاتیانە، چونکە سیستمی دارایی بەگشتی لە عێراق متمانەی نییە و پارەکان زۆرینەی لای هاووڵاتییانە ئەمەش گرفتی کۆکردنەوەی پارە دروست دەبێت، دەڵێت “هەر بۆیە پارەی مووچە ئامادەیە و عێراق بۆ دابینکردنی مووچە گرفتی نەختینەی نییە.”