تمەن هاڕەی کرد و خواست لەسەر کڕینی زیادیکردووە

SNN

لەگەڵ بەردەوامیی خۆپیشاندانەکان لە 31 پارێزگای ئێران و دابەزینی مێژوویی بەهای تمەن، لە بازاڕی دراوی سلێمانی خواستێکی زۆر لەسەر کڕینی دراوی ئێرانی دروستبووە. هاوکات پچڕانی ئینتەرنێت لە ناوخۆی ئێران مامەڵە بازرگانییەکانی پەکخستووە و بازرگانان پەنا بۆ مەرزەکان دەبەن بۆ ڕاییکردنی حەواڵەکانیان.

خواست لەسەر تمەن و جیاوازیی نرخەکان

لە بازاڕی دراوی سلێمانی، تمەنی ئێرانی بە خێراییەکی بێپێشینە مامەڵەی پێوەدەکرێت و مامەڵەکاران ئاماژە بەوە دەکەن کە یەک ملیار تمەن تەنها لە پێنج بۆ 10 خولەکدا دەفرۆشرێت. لە ئێستادا نرخی 100 دۆلاری ئەمریکی بە کاش لە هەرێمی کوردستان بەرامبەرە بە 11 ملیۆن و 100 هەزار تمەن، بەڵام لە شێوەی حەواڵەدا لە ناوخۆی ئێران گەیشتووەتە ئاستی پێوانەیی 14 ملیۆن و 400 هەزار تمەن.

پچڕانی ئینتەرنێت و پەککەوتنی حەواڵەکان

سنووردارکردنی خزمەتگوزارییەکانی ئینتەرنێت لەلایەن دەسەڵاتدارانی ئێرانەوە، کێشەی گەورەی بۆ بازرگانان دروستکردووە، بەتایبەت لە پرۆسەی ناردنی حەواڵە داراییەکاندا. ئەم دۆخە وایکردووە بازرگانان نەتوانن بە ئۆنلاین مامەڵە بکەن و ناچاربوون بۆ ڕاییکردنی ئاڵوگۆڕە دراوییەکانیان ڕوو لە مەرزەکان بکەن و بە شێوەی مەیدانی کارەکانیان ئەنجام بدەن، هەندێک لە وەبەرهێنەرانیش بە هیوای دووبارە بەهێزبوونەوەی تمەن، دەستیان بە کڕینی کردووە.