وەزارەتی دارایی هەرێم بۆ بەغدا: تۆمەتەکانی سەرۆکی دەستەی دەروازەکان بێ بنەمان

SNN-

وەزارەتی دارایی و ئابووریی حکومەتی هەرێمی کوردستان، لە ڕاگەیەندراوێکی فەرمیدا وەڵامی لێدوانەکانی (عومەر وائیلی) سەرۆکی دەستەی دەروازە سنوورییەکانی عێراقی دایەوە و سەرجەم ئەو تۆمەتانەی ڕەتکردەوە کە لە ئەنجومەنی نوێنەران ئاراستەی هەرێمی کردبوو. وەزارەتەکە دەڵێت: “کەمی داهاتی عێراق پەیوەندی بە گەندەڵی و قاچاخچێتی ناوخۆیانەوە هەیە، نەک هەرێم.”

هۆکارە ڕاستەقینەکانی دابەزینی داهاتی عێراق

وەزارەتی دارایی پێنج خاڵی سەرەکی وەک هۆکاری دابەزینی داهاتی دەروازەکانی حکومەتی فیدراڵ دەستنیشان دەکات، لەوانە:

-گەندەڵی ئیداری و دارایی: بوونی دەستوەردانی سەرۆک هۆزەکان و قاچاخچییەکان لە دەروازەکانی عێراقدا.
-سیستەمی گومرگی: زیادبوونی گومرگی هەندێک کاڵا بۆ (٣٠) هێندە، کە بووەتە هۆی پاشەکشەی بازرگانی.
– چەواشەکاری لە داتا: وەزارەت ئاماژە بەوە دەکات کە پێشتر بەرپرسانی عێراق باسیان لە زیادبوونی ١٠٠٪ی داهات دەکرد، ئێستا بۆ پەردەپۆشکردنی شکستی خۆیان تۆمەت بۆ هەرێم هەڵدەبەستن.

یەکخستنی پێناسی گومرگی و دەروازەکان

لە ڕاگەیەندراوەکەدا هاتووە کە حکومەتی هەرێم هەمیشە داوای یەکخستنی پێناسی گومرگی و جێبەجێکردنی سیستەمی (ئەسیکۆدا)ی کردووە، بەڵام بەغداد جدی نەبووە. سەبارەت بە دەروازە “نافەرمییەکان”یش، وەزارەت جەخت دەکاتەوە کە ئەو دەروازانە لای هەرێم و وڵاتانی دراوسێ (ئێران و تورکیا) فەرمین و تەنها بەغداد دانی پێدا نەناون.

پرسی مووچە و داهاتی نەوت

وەزارەتی دارایی بە توندی ڕەخنە لە دەستوەردانی سەرۆکی دەستەی دەروازەکان دەگرێت لە بابەتی مووچە و دەڵێت:
1. پشکی هەرێم مافە نەک خێر: ناردنی بودجە پابەندییەکی دەستوورییە، لە کاتێکدا عێراق لە ١٢ ساڵی ڕابردوودا بەردەوام فشاری ئابووری و بڕینی مووچەی وەک کارتێکی فشار بەکارهێناوە.
2. داهاتی نەوت: وەزارەت وەبیری بەغدای دەهێنێتەوە کە دەوڵەتی عێراق لەسەر نەوتی کەرکوک و کوردستان دامەزراوە، و کاتێک عێراق سوودمەند بوو لە نەوتی باکوور، نەوتی بەسرە هێشتا بوونی نەبوو.

گەندەڵی لە بازگەکانی نێوان هەرێم و عێراق

ڕاگەیەندراوەکە ئاشکرای دەکات کە دانانی نووسینگەی گومرگی لە (ئەلسەد، چیمەن، دارەمان) لەلایەن بەغدادەوە، پێچەوانەی یاسا نێودەوڵەتییەکانە و بووەتە سەرچاوەی وەرگرتنی “بەرتیل” و دووجار گومرگکردنی کاڵاکان، کە ئەمەش زیانی گەورەی بە داهاتی هەرێم گەیاندووە.

کۆتایی و ڕێکاری یاسایی

وەزارەتی دارایی و ئابووری دووپاتی دەکاتەوە کە هەموو داتا و زانیارییەکان لای دیوانی چاودێری دارایی فیدراڵ ڕوونن و شەفافیەت لە داهاتەکاندا هەیە. لە کۆتاییدا ڕایگەیاندووە کە مافی یاسایی خۆیان دەپارێزن بۆ گرتنەبەری ڕێکاری یاسایی بەرامبەر هەر تۆمەتێکی بێ بنەما کە ئاراستەی هەرێم بکرێت.