تۆم باراک: یەکەم هەنگاوی بنەڕەتی جێبەجێکردنی تەواوی ئاگربەستەکەیە

SNN

تۆم باراک، نێردەی تایبەتی سەرۆکی ئەمریکا بۆ سووریا، ڕایگەیاند کە لەگەڵ ژەنەڕاڵ مەزڵوم عەبدی و ئیلهام ئەحمەد کۆبووەتەوە و پشتیوانیی وڵاتەکەی بۆ پرۆسەی یەکخستنی نێوان هێزەکانی سووریای دیموکرات و حکومەتی سووریا دووپاتکردووەتەوە.

پشتیوانیی بەهێز بۆ پرۆسەی یەکخستن

لە پەیامێکدا، تۆم باراک نووسیویەتی: “شانازییەک بوو بۆمان کە ئەمڕۆ چاومان بە گەنەڕاڵ مەزڵوم عەبدی و ئیلهام ئەحمەد کەوت.” ناوبراو جەختی لەوە کردەوە کە “ویلایەتە یەکگرتووەکانی ئەمریکا دووپاتی پشتیوانی و پابەندبوونی بەهێزی خۆی کردەوە بۆ پێشخستنی پرۆسەی یەکخستن کە لە ڕێککەوتننامەکەی 18ی کانوونی دووەمدا دیاری کراوە.”

ئاگربەست و ڕێوشوێنی دروستکردنی متمانە

نێردەکەی سەرۆکی ئەمریکا ئاشکرایکرد کە هەموو لایەنەکان لەسەر ئەوە کۆکن کە “یەکەم هەنگاوی بنەڕەتی، جێبەجێکردنی تەواوەتیی ئاگربەستی ئێستایە.” هەروەها ئاماژەی بەوەشکردووە کە لە هەمان کاتدا پێکەوە کاردەکەن بۆ دیاریکردن و جێبەجێکردنی “ڕێوشوێنی دروستکردنی متمانە لە هەموو لایەنەکانەوە، بۆ پەرەپێدانی متمانە و سەقامگیرییەکی بەردەوام.”