نوێترین زانیاری لەبارەی ئەگەری كەمكردنەوەی بەشەخۆراكی مانگانەی هاووڵاتییان
عەلی حەمە سەعید-SNN
لەگەڵ ئەوەی دەنگۆی كەمكردنەوەی بەشەخۆراكی مانگانەی هاووڵاتیان بڵاوبووەتەوە كە گوایە لەمساڵدا بڕی بەشەخۆراك كەمدەكرێتەوە، بەڵام بەرپرسێكی وەزارەتی بازرگانی هەرێم ئەو دەنگۆیانە رەتدەكاتەوە و جەخت لەوەدەكاتەوە كە تا ئەمڕۆ هیچ بڕیارێكی لەو شێوەیە لە عێراق نەدراوە.
نەوزاد شێخ كامیل، بەڕێوەبەری گشتی بازرگانی لە وەزارەتی بازرگانی و پیشەسازی حكومەتی هەرێم بە SNNی ڕاگەیاند: تا ئەمڕۆ لەلایەن وەزارەتی بازرگانی عێراقەوە هیچ شتێكمان پێنەوتراوە لەبارەی ئەگەری كەمكردنەوەی بەشەخۆراكی مانگانەی هاووڵاتییان، چونكە هیچ بڕیارێك نییە كە گۆڕانكاریی لە بابەتی بەشەخۆراكی مانگانەی هاووڵاتییاندا بكات.
ئاماژەی بەوەشكرد، لە پەیوەندیدانی لەگەڵ وەزارەتی بازرگانی عێراق و ئەوانیش لای خۆیانەوە جەختیان لەوەكردووەتەوە كە ئەو دەنگۆیانەی لەبارەی كەمكردنەوەی بەشەخۆراكی مانگانەی هاووڵاتیان بڵا بوونەتەوە هیچ بنەمایەكی ڕاستییان نییە و وەزارەتی بازرگانی عێراق هیچ بڕیارێكی لەو جۆرەی نەداوە.
ئەو بەرپرسەی وەزارەتی بازرگانی هەرێم ئەوەشی خستەڕوو، بەگوێرەی ئەو خشتەیەیەی كە چەند ساڵێكە كاری لەسەر دەكرێت بۆ ئەمساڵیش بەشەخۆراك بۆ هەر هاووڵاتییەك بریتییە لە نۆ كیلۆ ئارد و سێ كیلۆ برنج و یەك كیلۆ شەكر و یەك كیلۆ پاقلەمەنی، لەگەڵ ڕۆنی زەیت و دۆشاوی تەماتە.
