شاندێکی چوارچێوەی هەماهەنگی سەردانی هەرێمی کوردستان دەکات

SNN-

بڕیارە ئەمڕۆ شاندێکی باڵای چوارچێوەی هەماهەنگی بە سەرۆکایەتیی محەمەد شیاع سودانی، سەردانی هەرێمی کوردستان بکات و  ئامانج لە سەردانەکەش نێوەندگیرییە لە نێوان لایەنە کوردییەکان بۆ یەکلاییکردنەوەی پۆستی سەرۆک کۆمار و مسۆگەرکردنی پشتیوانی بۆ کابینەی داهاتوو.

لە چوارچێوەی هەوڵە چڕەکان بۆ دەربازکردنی پرۆسەی سیاسیی عێراق لەو بنبەستەی تێی کەوتووە، ئەمڕۆ دووشەممە 2ـی شوباتی 2026، شاندێکی باڵای چوارچێوەی هەماهەنگی سەردانی هەرێمی کوردستان دەکات و زنجیرەیەک کۆبوونەوە لەگەڵ سەرکردایەتیی سیاسیی کورد لە هەولێر و سلێمانی ئەنجام دەدات.

بە پێی زانیارییە پشتڕاستکراوەکان، شاندەکە کاتژمێر (11:00)ـی پێش نیوەڕۆ دەگەنە هەولێر.

شاندەکەی بەغدا پێکهاتووە لە (محەمەد شیاع سودانی، هادی عامری و موحسین مەندەلاوی)، کە نوێنەرایەتیی بڕیاری سیاسیی زۆرینەی لایەنەکانی ناو چوارچێوەی هەماهەنگی دەکەن.

عەباس رازی، ئەمینداری گشتیی چوارچێوەی هەماهەنگی، لە راگەیەنراوێکدا ئاشکرای کرد کە ئەم سەردانە دەرەنجامی دواین کۆبوونەوەی سەرکردایەتیی چوارچێوەکەیە و ئامانجی ستراتیژیی سەردانەکە بریتییە لە”دروستکردنی لێکتێگەیشتن و لێکنزیکردنەوەی بۆچوونەکان لە نێوان پارتی دیموکراتی کوردستان و یەکێتیی نیشتمانیی کوردستان”، بەتایبەت لەسەر پرسی یەکلاییکردنەوەی پۆستی سەرۆک کۆمار.