جومانە غەلای: هەفتەی داهاتوو پارەی كارمەندانی كۆمیسیۆن خەرج دەکرێت

عەلی حەمە سەعید-SNN
وتەبێژی كۆمیسیۆنی بالای سەربەخۆی هەڵبژاردنەكانی عێراق ئاماژە بەوەدەكات، لە هەفتەی داهاتووەوە دەستدەكەین بە خەرجكردنی پارەی كارمەندانی كۆمیسیۆن، هاوكات دابەشكردنی پارەكەش لەڕێگەی ڤیزاكارتی بانكییەوە دەبێت و تا كۆتایی ئەم مانگە پارەی سەرجەم كارمەندەكانی كۆمیسیۆن دابەشدەكرێت.

جومانە غەلای، وتەبێژی كۆمیسیۆنی باڵای سەربەخۆی هەڵبژاردنەكانی عێراق بە SNNی ڕاگەیاند: دوای تەواوكردنی وردبینیكردن لە ناوی ئەو كەسانەی كە وەك فەرمانبەری كۆمیسیۆن ناویان تۆماركرابوو بۆ بەڕێوەبردنی هەڵبژاردنی پەرلەمانی عێراق، ماوەی چەند ڕۆژێكیشە دەستمان كردووە بە ڕێكارەكانی خەرجكردنی بڕی پارەی ئەو كارمەندانە لەڕێگەی ڤیزا كارتەوە.

ئاماژەی بەوەشكرد، تا ئەمڕۆ پارەی كارمەندانی حەوت پارێزگا لەڕێگەی ڤیزاكارتەوە جكۆتایی هاتووە و تا كۆتایی ئەم مانگەش پارەی سەرجەم كارمەندەكان خەرجدەكرێت، هاوكات ئەوانەشی كە ڤیزا كارتییان نییە لەڕێگەی بانكەكانەوە پارەكانیان بۆ خەرجدەكرێت.

وتەبێژەكەی كۆمیسۆنی باڵای سەربەخۆی هەڵبژاردنەكانی عێراق ئەوەشی خستەڕوو، بە گوێرەی ئەو گرێبەستەی كە لەنێوان كۆمیسیۆن و ئەو كارمەندانە هەبووە، بڕی پاداشتی كارمەندانی ڕۆژی هەڵبژاردن بەجۆرێكە كە سەرپەرشتیارانی بنكەی دەنگدان كە فەرمانبەری حكومەت نین 400 هەزار دینار وبەڕێوەبەری وێستگە 300 هەزار دینار و كارمەندی سەر سندووقەكانیش 200 هەزار دینار وەردەگرن، بەڵام سەرپەرشتیاری بنكەی دەنگدان كە فەرمانبەری حكومەت بوون 300 هەزار دینار و بەڕێوەبەری وێستگە 200 هەزار دینار و كارمەندی سەر سندووقەكانیش 150 هەزار دینار وەردەگرن.