48 ملیار دینار لە داهاتی نانەوتیی سلێمانی ڕەوانەی هەولێر کرا
مووچە
SNN
بڕی 48 ملیار دینار لە داهاتی نانەوتیی پارێزگای سلێمانی ئاڕاستەی شاری هەولێر کرا و ڕادەستی بانکی منارە کرا.
ئەمەش دوای ئەوە دێت کە دوێنێ وەزارەتی دارایی و ئابووریی هەرێمی کوردستان بە نوسراوی فەرمی داوای لە بەڕێوەبەرایەتیی گشتیی بانکی ناوەندی هەرێم لقی سلێمانی کردووە بڕی 48 ملیار داهاتی نانەوتی سلێمانی و هەڵەبجە بنێرن بۆ بانکی منارە بە مەبەستی تەواوکردنی داهاتی نانەوتی مانگی یەکی ئەمساڵ و ناردنی 120 ملیار دینار بۆ وەزارەتی دارایی عێراق.
ئەم پڕۆسەی گواستنەوەی داهاتە لە چوارچێوەی ڕێکخستنی دارایی و کۆکردنەوەی داهاتە ناوخۆییەکان دێت بۆ پڕکردنەوەی ئەو پابەندییە داراییانەی کە لەسەر حکومەتی هەرێمی کوردستانن.
دابینکردنی مووچە و پشکی پارێزگاکان
بۆ تەمویلکردنی مووچەی مانگی 1ـی 2026، پێویستە حکومەتی هەرێمی کوردستان بڕی 120 ملیار دینار وەک داهاتی ناوخۆ بنێرێت بۆ حکومەتی فیدراڵی لە بەغدا.
لەو چوارچێوەیەدا، بڕی 48 ملیار دینار لەلایەن پارێزگای سلێمانییەوە دابینکراوە، بڕی 72 ملیار دیناری دیکەش لەلایەن پارێزگاکانی هەولێر و دهۆکەوە دابین دەکرێت تاوەکو کۆی بڕی پێویست بۆ خەرجکردنی مووچەی فەرمانبەران تەواو بکرێت.
