ژمارەی كورسییەكانی یەكێتی لە پەرلەمانی عێراق زیاد دەكات

عەلی حەمە سەعید-SNN

لەگەڵ ئەوەی ئەمڕۆ كۆتا وادەبوو بۆ سوێندخواردنی ئەو كاندیدانەی كە دەنگی پێویستیان هێنابوو بۆ ئەوەی ببنە پەرلەمانتار، بەڵام پارێزگاری سەلاحەدین كە دەنگی پێویستی هێنابوو بۆ بوون بە پەرلەمانتار ئەمڕۆ سوێندی یاسایی نەخواردوو بەوهۆیەشەوە كاندیدێكی یەكێتی جێگەی دەگرێتەوە، بەوجۆرەش ژمارەی كورسییەكانی یەكێتی لەپەرلەمانی عێرا قلە 18 كورسییەوە بۆ 19 كورسی زیاد دەكەن.

كەریم شوكر، كاندیدی یەكێتی لە لیستی هاوپەیمانی ( جەماهیری وەتەنی) كە زۆرترین دەنگی بەدەستهێناوە لە دوای ( بەدر مەحمود) پارێزگاری ئێستای سەلاحەدین، بە SNNی ڕاگەیاند: من ئێستا لە پەرلەمانم بۆ ئەوەی لەجێگای ( بەدر مەحمود) پارێزگاری سەلاحەدین سوێندی یاسایی بخۆم، چونكە پارێزگاری سەلاحەدین لەگەڵ ئەوەی ئەمڕۆ هاتە پەرلەمان بەلام دواتر گەڕایەوە سەر پۆستەكەی خۆی وەك پارێزگاری سەلاحەدین دەستبەكار بوویەوە و سوێندی یاسایی وەك پەرلەمانتار نەخوارد.

ئاماژەی بەوەشكرد، ئێستا تەنها ئەوە ماوە كە لەلایەن كۆمیسیۆنەوە ناوەك بدرێت بە پەرلەمان بۆ ئەوەی وەك جێگرەوەی ( بەدر مەحمود) پارێزگاری سەلاحەدین سوێندی یاسایی بخۆم و ببمە پەرلەمانتار، هاوكات بەپێی ڕیزبەندی كۆمیسیۆنیش من لەدوای ناوبراوەوە دێم كە زۆرترین دەنگم بەدەستهێناوە.