رۆژنامەی عەرەبی: سبەینێ سەرۆککۆماری عێراق هەڵدەبژێردرێت
فۆتۆی کۆبوونەوەکەی بافڵ جەلال تاڵەبانی و مەسعود بارزانی
SNN
رۆژنامەی سەباحی عێراقی لە زاری سەرچاوەکانەوە ئاشکرایکردووە، ئەگەری هەیە سبەینێ پێنجشەممە لەپەرلەمانی عێراق پۆستی سەرۆککۆمار یەکلا بکرێتەوە.
ئەمڕۆ چوارشەممە 11ی شوبات، رۆژنامەی سەباحی نیمچە فەرمی عێراقی بەپشتبەستن بە سەرچاوەکانی لەناو پەرلەمانی عێراقدا ئاماژەی بەوەکردووە، ئەگەری هەیە سبەینێ پێنجشەممە لە دانیشتنی پەرلەماندا هه ڵبژاردنی سەرۆککۆمار بەڕێوەبچێت، ئەمە لە کاتێکدایە ناکۆکییه سیاسییەکان و دواخستنی یەكلاكردنەوەی ئەو شایستە دەستورییە بەردەوامی هەیە.
ئەندامانی پەرلەمانی عێراق جەختیان کردەوە، لە دانیشتنی ئەمڕۆی پەرلەماندا دەنگدان لەسەر پۆستی سەرۆککۆمار ناكرێت، بەو پێیەی لە بەرنامەی کاری پەرلەماندا نییە، پێشنیازی دواخستنی كراوە تا کۆتایی هاتنی گفتوگۆكانی لایەنی كوردی.
هاوکات، وابڕیارە ئەمڕۆ چوارشەممە بۆ دیاریکردنی کاندیدێک بۆ پۆستی سەرۆککۆمار لەسەر ئاستی باڵا کۆبوونەوەیەکی یەكلاكەرەوە لە نێوان پارتی دیموکراتی کوردستان و یەکێتی نیشتمانی کوردستان بە سەرپەرشتی بافڵ جەلال تاڵەبانی سەرۆکی یەکێتیی نیشتمانی کوردستان و مەسعوود بارزانی سەرۆکی پارتی دیموکراتی کوردستان لە هەولێر بەڕێوەبچێت.
