بۆ پرسی هەڵبژاردنی سەرۆککۆمار پەنا دەبرێتە بەر دادگای فیدراڵی

SNN-

فەرمانگەی ڕاگەیاندنی پەرلەمانی عێراق ڕایگەیاند، هەیبەت حەلبوسی، سەرۆکی پەرلەمانی عێراق نوسراوێكی پێشکەش بە دادگای باڵای فیدراڵی کردووە سەبارەت بە پێویستی لێکدانەوە مادەی (72/دووەم/ب) کە تایبەتە بە بەردەوامی ئەرکەکانی سەرۆککۆمار و وادەی هەڵبژاردنی سەرۆکێکی نوێ.

حەلبوسی داوای شرۆڤەی ئەو مادە دەستورییەی كردووە کە تیایدا هاتووە: سەرۆککۆمار بەردەوام دەبێت لە جێبەجێکردنی ئەرکەکانی تا دوای کۆتاییهاتنی هەڵبژاردن پەرلەمانی نوێ و کۆبونەوەی، بەمەرجێک سەرۆککۆماری نوێی کۆماری عێراق لە ماوەی 30 ڕۆژدا لە بەرواری یەکەم دانیشتنیەوە هەڵدەبژێردرێت, كە بەهۆی نەبوونی نیسابی یاسایی لە دانیشتنەکانی پەرلەماندا، سەرۆككۆماری نوێ تائێستا هەڵنەبژێراوە سەرەڕای هەوڵەکانی سەرۆکايەتى پەرلەمان بۆ بانگهێشتکردنی پەرلەمانتاران بەبێ دواخستن.

فەرمانگەی راگەیاندنی پەرلەمانی عێراق لە بەیاننامەيەکدا ئاماژەی بەوەشكردووە، ئەم داوایە رەنگدانەوەی فەلسەفەی سەرۆکایەتی پەرلەمانە بۆ پاراستنی کارکردنی بێ کێشەی پەرلەمان و دڵنیابوون لەوەی کە پرۆسەی سیاسی نەکەوێتە بۆشایی دەستووری یان پێشێلکاری دەستووری ئەنجام نەدات کە رەنگە كێشە بۆ شەرعیەتی حکومەتی داهاتوو دروست بكات.