وادەی كۆتایی هاتنی پێدانی هاوكاری هاوپەیمانان بۆ لیواهاوبەشەكان راگەیەندرا

عەلی حەمە سەعید-SNN

دابەشكردنی پارەی هاوپەیمانان بۆ لیواهاوبەشەكانی سەر بەوەزارەتی پێشمەرگە بڕەكەی لەمانگێكەوە بۆ مانگێكی دیكە گۆڕانكاری بەسەردا دێت، هاوكات بەرپرسێكی وەزارەتی پێشمەرگەش جەخت لەوەدەكاتەوە كە هاوكارییە مانگانە تا كۆتایی ئەمساڵ بەردەوامی دەبێت.

بەگوێرەی ئەو زانیارییانەی كە لە بەرپرسێكی وەزارەتی پێشمەرگە بە SNNدراون ئەوەخراوەتەڕوو، بڕی هاوكاری هاوپەیمانان بۆ لیواهاوبەشەكان مانگانە نزیكەی25 ملیاردینارە، ئەم بڕە پارەیە جێگیرە و گۆڕانكاری بەسەردا نایەت، بەڵام مانگانە ژمارەی پێشمەرگە و ئەفسەرانی سەر بە لیواهاوبەشكان زیاد دەكەن، ئەوەش بەهۆی یەكستنەوەی هێزەكانی یەكەی 70 و 80، بۆیە مانگانە بڕی هاوكارییەكانیش كەمدەكات.

ئاماژەی بەوەشكرد، ئەوەی بە ئێمە وتراوە لەلایەن هێزەكانی هاوپەیمانان بە تایبەت ئەمەریكا ئەوەیە كە پێدانی هاوكاری ماددی بۆ لیواهاوبەشەكان تا كۆتایی ئەمساڵ بەردەوامی دەبێت، هاوكات مانگانە لەكاتی خۆیدا دابەشدەكرێت بەڵام بڕەكەی لەمانگێكەوە بۆ مانگێكی دیكە جیاواز دەبێت.

وتەكانی ئەو بەرپرسەی وەزارەتی پێشمەرگە لەكاتێكدایە كە لەسەرەتای دابەشكردنی هاوكاری هاوپەیمانان بۆ لیوا هاوبەشەكان هەموو پێشمەرگەو ئەفسەرێكی بەو لیواهاوبەشانە بڕی، 330 هەزار دیناریان پێدەدرا، بەڵام دواتر مانگ لەدوای مانگ بڕەكەی كەمكرایەوە ودواجاریش بڕی 76 هەزار دینار درایە لیواهاوبەشەكان وەك هاوكاری هاوپەیمانان.