بەرپرسانی ئەمریکا: لە شەممەوە ئامادەین بۆ هێرشکردنە سەر ئێران

SNN-

کەناڵی CBS لە زاری بەرپرسانی باڵای ئاسایشی نەتەوەیی ئەمریکاوە بڵاویکردووەتەوە، لە ڕۆژی شەممەوە ئەگەری هێرشی سەربازیی ئەمریکا بۆ سەر ئێران هەیە و هاوکات کەناڵی CNNـیش ئاشکرای کردووە سوپای ئەمریکا کۆشکی سپی ئاگادارکردووەتەوە کە کۆتایی ئەم هەفتەیە ئامادە دەبن بۆ هێرشکردن، بەڵام تاوەکو ئێستا ترەمپ بڕیاری کۆتایی لەسەر هێرشکردنە سەر ئێران نەداوە.

جێگیرکردنی 13 کەشتیی جەنگی

بەپێی زانیارییەکانی ڕۆژنامەی Wall Street Journal هێزی دەریایی ئەمریکا لە ئێستادا 13 کەشتیی جەنگی لە ڕۆژهەڵاتی ناوەڕاست جێگیرکردووە، بەرپرسانی ئەمریکیش بە ڕۆژنامەکەیان ڕاگەیاندووە ئەو هێزەی کۆکراوەتەوە لە توانایدایە بۆ ماوەی چەند هەفتەیەک هێرشی ئاسمانی لە دژی ئێران ئەنجام بدات.

جووڵەی فڕۆکەهەڵگرەکە و گۆڕینی ڕژێم

ڕۆژنامەی New York Times بڵاویکردووەتەوە فڕۆکەهەڵگری جیراڵد فۆرد کۆتایی ئەم هەفتەیە یان سەرەتای هەفتەی داهاتوو دەگاتە ڕۆژهەڵاتی ناوەڕاست و بە ئەگەرێکی زۆرەوە لە کەناراوەکانی ئیسرائیل لەنگەر دەگرێت، هاوکات بەرپرسانی ئاسایشی نیشتمانیی ئەمریکا ترەمپیان ئاگادارکردووەتەوە کە دڵنیا نین لە سەرکەوتنی هەر پڕۆسەیەک کە ئامانج لێی گۆڕینی ڕژێمی ئێران بێت.

ئامادەباشیی ئیسرائیل و ڕاوێژەکانی ترەمپ

ڕۆژنامەی مەعاریفی ئیسرائیلی لە سەرچاوەیەکی سەربازییەوە ئاشکرای کردووە، سوپای ئیسرائیل ماوەی مانگێکە لە ئەوپەڕی ئامادەباشیدایە و ڕۆژ لە دوای ڕۆژ ئاستی ئامادەباشی زیاتر دەبێت، لەلایەکی دیکەوە ترەمپ بەردەوامە لە وەرگرتنی بیروبۆچوونی ڕاوێژکار و هاوپەیمانەکانی لەبارەی باشترین بژاردە کە لەدژی ئێران بیگرێتەبەر.