سەرمایەکی سەخت بەڕێوەیە و هۆشداری دەدرێت

SNN-

دەستەی کەشناسیی عێراق رایگەیاند، بەپێی نەخشە کەشوهەواییەکان، وڵات ڕووبەڕووی شەپۆلێکی سەختی سەرما دەبێتەوە کە سەرچاوەکەی هەوای جەمسەرییە.

بەگوێرەی پێشبینییەکان، کاریگەریی ئەم شەپۆلە سەرەتا لە ناوچەکانی باکوور و ڕۆژئاوا دەردەکەوێت و پاشان بەرەو ناوەڕاست و باشوور دەکشێت. پلەکانی گەرما بەشێوەیەکی بەرچاو دادەبەزن، بەتایبەت لە شەواندا کە کەشەکە لە ناوچە کراوە و بیابانییەکاندا زۆر سارد دەبێت.

کەشناسی ئاماژەی بەوەشکردووە، جیاوازییەکی زۆر لەنێوان پلەی گەرمیی شەو و ڕۆژدا دروست دەبێت و بای باکووری ڕۆژئاواش هەستی سەرماکە زیاتر دەکات.

هاوکات ئەگەری نمەباران لە باکوور و ڕۆژئاوا هەیە و هۆشداریش دەدرێت بە جووتیاران کە لە بەرەبەیاندا ئامادەکاری بۆ ڕوودانی شەختە و بەستەڵەک بکەن بۆ پاراستنی بەروبوومەکانیان.