رۆژنامەی الصباح: مووچەی فەرمانبەران مسۆگەر كراوە

SNN-

سەرەڕای ئەو نیگەرانییانەی لەبارەی دۆخی دارایی عێراق بڵاودەكرێنەوە، سەرچاوە فەرمییەکان ئاماژە بەوە دەکەن، یەدەگی دراوی بیانی عێراق بەردەوام لە بەرزبوونەوەدایە، مووچەی فەرمانبەرانیش بە تەواوی مسۆگەركراوە، ئەو نیگەرانییانەی هەشن پەیوەندی بە پێشبینییەکانی داهاتووەوە هەیە نەک قەیرانێکی راستەقینە.

جاسم عەلاوی، پەرلەمانتاری عێراق بە رۆژنامەی (الصباح)ی راگەیاندووە، دۆخی دارایی جێگیرە، یەدەگی دراوی بیانی عێراق لە ئاستێکی باشدایە، یەدەگی نەختیش لە ئاستێكی باشدایەو پارەش هەیە.

ئەو پەرلەمانتارە ئاماژەی بەوەسکردووە، ئەو نیگەرانیانەی وروژێنراون پەیوەندییان بە ئەگەرەکانی داهاتووەوە هەیە وەک هەڵبەزو دابەزی نرخی نەوت یان هەر گرژییەکی هەرێمایەتی کە ڕەنگە کاریگەری لەسەر داهات هەبێت.

دەشڵێت، ئەو کەمی نەختینە كاتییە، بەشێکی دەگەڕێتەوە بۆ دوودڵی بەشێک لە هاوڵاتیان و وەبەرهێنەران كە پەلەناكەن لەوەی پارەکانیان بخەنە ناو بازاڕ، بەڵام کاریگەری لەسەر یەدەگی دراوی نەختینە نییە.