کەشناسی هەرێم وادەی هاتنی شەپۆلی تاوەباران و بەفربارین رادەگەیەنێت

SNN

ئەمڕۆ سێشەممە بەڕێوەبەرایەتی گشتی کەشناسی هەرێم بڵاویکردووەتەوە، سبەینێ ئاسمان بە گشتی نیمچە هەورە دەبێت، هەندێک کات لەسەر ناوچە شاخاویەکان بارانی مامناوەند و هەورە بروسکە دەبێت، دەڵێت: لەسەر ناوچە شاخاوییەکان بەفربارین دەبێت.

کەشناسی هەرێم لە راگەیەنراوێکدا سەبارەت بە کەشی ئەمڕۆ روونیکردووەتەوە، لەئەنجامی کاریگەریەکانی نزمە پەستانی نیمچە دوورگەری عەرەبی و بارستەهەوای ساردی باکوور ئاسمان هەرێم  بەگشتی ناسەقامگیر دەبێت  و هەوری تەواو دەبێت لەگەڵ بارینی نمە بارانی جیاجیا، هەندێک کات لەسەر ناوچە شاخاویەکان بارانی مامناوەند و هەورە بروسکە دەبێت.

بۆ کەشی سبەینێ چوارشەممە ئاماژە بەوەدەکات، سبەینێ لە ئەنجامی هاتنی نزمە پاڵەپەستۆیەک بۆ سەر ناوچەکە، گۆڕانکاری لە کەشوهەوا دروست دەبێت، بارانبارین دەستپێدەکاتەوە و پلەکانی گەرما نزم دەبنەوە، هەروەها بەفر بارین لەسەر ناوچە شاخاویە سنوریەکان و بەرزەکان ،کاریگەری ئەم ناجێگیریە بۆ رۆژانی هەینی و شەممە درێژ دەبێتەوە .

ئاراس جەباری کەشناسیش جەختدەکاتەوە، لە کاتەکانی دوای نیوەرۆ تا کاتی ئێوارەی ئەمڕۆ ناوبەناو لە شوێن و کاتی جیاجیادا لەناوچەکانی سنوری پارێزگای هەولێر و دهۆک و سلێمانی و هەڵەبجە و ئیدارەی راپەرین و سۆران لەئەنجامی ناجێگیریەکی لاواز لە بەرگەهەوای ناوچەکەدا ئەگەری دروستبوونی کەڵەکە هەوری بروسکە و تاوە بارانی سنوردار و کورت خایان ئەبێت و پاشان لەشەودا کەش جێگیر ئەبێتەوە.