بافڵ جەلال تاڵەبانی بۆ مەزڵوم عەبدی: لە پشتیوانیکردنی ڕۆژئاوا بەردەوام دەبین

SNN

بافڵ جەلال تاڵەبانی، سەرۆکی یەکێتیی نیشتمانیی کوردستان، لە دەباشان پێشوازیی لە ژەنەڕاڵ مەزڵوم عەبدی، فەرماندەی گشتیی هێزەکانی سووریای دیموکرات (هەسەدە) کرد.

تاوتوێکردنی دۆخی سووریا و ڕۆژئاوا
لە کۆبوونەوەکەدا، کە قوباد تاڵەبانی، ئەندامی مەکتەبی سیاسیی یەکێتی ئامادەیبوو، دۆخی گشتیی سووریا و ڕۆژئاوای کوردستان تاوتوێ کرا. ژەنەڕاڵ مەزڵوم عەبدی پوختەیەکی لەبارەی بەشداریکردنی لە کۆنفرانسی ئاسایشی میونشن و دوایین گۆڕانکارییەکانی دۆخی سووریا خستەڕوو.

سوپاس و پشتیوانی
فەرماندەی گشتیی هەسەدە سوپاسی یەکێتیی نیشتمانیی کوردستانی کرد بۆ هەڵوێست و پشتیوانییە بەردەوامەکانیان لە پرۆسەی بەرەنگاربوونەوەی تیرۆردا.

لەلایەن خۆیەوە، سەرۆک بافڵ جەختی لەسەر بەردەوامیی پشتیوانییەکانیان کردەوە و ڕایگەیاند: “لە پشتیوانیکردنی ڕۆژئاوای کوردستان بەردەوام دەبین، تاوەکو دڵنیاببینەوە سووریا دەبێتە وڵاتێک کە هەمووان ماف و نوێنەرایەتیی خۆیان تێیدا دەبێت و حکومەتەکەشی دەرخەری هەمەچەشنیی کۆمەڵگەی سووریا بێت.”