مەزڵوم عەبدی: دیدارمان لەگەڵ سەرۆکی یەکێتی هاوکاریی هاوبەشمان بەهێز دەکات

SNN

مەزڵوم عەبدی، فەرماندەی گشتیی هێزەکانی سووریای دیموکرات (هەسەدە)، لە دوو پۆستی جیادا لە تۆڕی کۆمەڵایەتیی ئێکس، وردەکاریی کۆبوونەوەکانی لەگەڵ بەڕێزان بافڵ جەلال تاڵەبانی و تۆم باراک ئاشکرا کرد.

دیدارێکی بەرهەمدار لەگەڵ سەرۆک بافڵ

سەبارەت بە کۆبوونەوەی لەگەڵ سەرۆکی یەکێتیی نیشتمانیی کوردستان، مەزڵوم عەبدی نووسیویەتی: “خۆشحاڵ بووین کە لە دیدارێکی بەرهەمدار و بەسووددا لەگەڵ بافڵ تاڵەبانی کۆبووینەوە. بەهای هاوبەشی و کارکردنی پێکەوەیی بۆ گەیشتن بە داهاتوویەکی باشتر بۆ گەلەکەمان بە نرخ دەزانین.”

فەرماندەی گشتیی هەسەدە جەختی لەوە کردەوە کە “ئەم دیدارە هاوکاریی هاوبەشمان بەهێز دەکات و ڕەنگدانەوەی پابەندبوونمانە بۆ بونیادنانی پەیوەندییەکی بەهێز و بەرهەمدار.”

کۆبوونەوە لەگەڵ نێردەی ئەمریکا

هاوکات، مەزڵوم عەبدی ئاماژەی بە کۆبوونەوەی لەگەڵ تۆم باراک، نێردەی تایبەتی ئەمریکا بۆ سووریا کرد و ڕایگەیاند: “کۆبوونەوەیەکمان ئەنجامدا، تێیدا باسمان لە دوایین پێشهاتەکانی ناوچەکە کرد، لەوانە ڕێککەوتنی 29ی کانوونی دووەم.”

ناوبراو وتیشی: “ئەم دیدارە دەرفەتێکی بۆ ئاڵوگۆڕی بیروڕا ڕەخساند، سەبارەت بە ڕێگاکانی بەهێزکردنی سەقامگیری و ئاسایش لە ناوچەکە و پێکەوە کارکردن بۆ ڕووبەڕووبوونەوەی ئاستەنگەکانی بەردەم گەلی سووریا.”