هاوردەکردنی زێڕ و مۆبایل لە ڕێگەی فڕۆکەخانەکانی هەولێر و سلێمانی قەدەغە کرا

SNN-
دەسەڵاتی فڕۆکەوانی مەدەنی عێراق بڕیارێکی نوێی دەرکردووە کە تێیدا ڕێگری لە گواستنەوەی چەند کاڵایەکی دیاریکراو لە ڕێگەی فڕۆکەخانەکانی هەولێر و سلێمانییەوە دەکات.

بەپێی نووسراوە فەرمییەکە، لەمەودوا ڕێگە نادرێت زێڕ، مۆبایل و ئامێرە ئەلیکترۆنییەکان لە ڕێگەی ئەو دوو فڕۆکەخانەیەوە هاوردە بکرێن یان بگوازرێنەوە.

حکومەتی فیدراڵ هۆکاری ئەم قەدەغەکردنەی بۆ دوو خاڵی سەرەکی گەڕاندووەتەوە:

نەبوونی بنکەی پشکنین و کۆنترۆڵی جۆری سەر بە حکومەتی بەغدا لە فڕۆکەخانەکانی هەولێر و سلێمانی، کە بەرپرسن لە پشکنینی زێڕ و لێدانی مۆری فەرمی (قۆغە).

ئەو مۆبایل و ئامێرە تەکنەلۆژیانەی لەوێوە هاوردە دەکرێن، مۆڵەتی فەرمی دەستەی ڕاگەیاندن و گەیاندنی عێراقیان نییە، ئەمەش بە نایاسایی لە قەڵەم دراوە.

ئەم بڕیارە فشارێکی زۆر دەخاتە سەر بازرگانانی هەرێمی کوردستان و ڕەنگە ببێتە هۆی بەرزبوونەوەی نرخی ئەو کاڵایانە لە بازاڕەکانی ناوخۆدا.