بۆ هاتنی مووچە مانگی دوو تەنها یەک مەرج ماوە هەرێم جێبەجێی بکات

بەغدا هەموو ئامادەكارییەكانی ناردنی مووچەی هەرێمی تەواو كردووە و چاوەڕێی هەرێمە كە تا ئێستا 120 ملیار دینارەكەی داهاتی ناوخۆی ئامادە نەكردووە، دارایی عێراق بە حکومەتی هەرێمی راگەیاندووە، 120 ملیارەکە بنێرن مووچەی مانگی دوو رەوانە دەکەن.
ئێوارەی ڕۆژی دووشەممە وەزارەتی دارایی هەرێم لیستی مووچەی مانگی شوبات و تەرازووی پێداچوونەوەی مانگی كانوونی دووەمی ڕەوانەی بەغدا كرد، بەڵام دوای سێ ڕۆژ هێشتا ئەو 120 ملیارەی ئامادە نەكردووە كە پێویستە بۆ ناردنی مووچەی مووچەخۆرانی هەرێم لەلایەن بەغدا ڕەوانە بكرێت.
بەگوێرەی زانیارییەکانی سەرچاوەیەک لە دارایی هەرێمەوە، دوای گەیشتنی لیستی مووچە بە بەغدا، لەئێستادا وردبینیكردن تیایدا كۆتایی هاتووە، هاوكات وەزارەتی نەوتی عێراق لە بەردەوامیی هەناردەكردنی نەوتی هەرێم بەپێی ئەو بڕەی لەسەری ڕێككەوتوون، وەزارەتی دارایی عێراقی ئاگادار كردووەتەوە.
ئاماژەی بەوەکردووە، بەو پێیە لیستی مووچە و تەرازوی پێداچوونەوە و نوسراوی بەردەوامی هەناردەکردنی نەوت بۆ دارایی عێراق نێردراوە تەنها ئەوەندە مەاوە دارایی هەرێم 120 ملیار دینارەکە رەوانە بکات تاکو مووچەی مانگی دوو تەمویل بکرێت.

ئەوەخراوەتە روو، لە ئێستادا دارایی هەرێم سەرقاڵی ئامادەکردنی 120 ملیار دینارەکەیە و بە ئەگەری زۆرەوە ئەم هەفتەیە رەوانە دەکرێت، پێشتریش عەلی حەمەساڵح رایگەیاندبوو، ئەگەر ئەمرۆ 120 ملیار دینارەکە رەوانە بکرێت دارایی عێراق لە دوای سێ رۆژ پارەکە تەمویل دەکات.