ئێران لەبارەی پەکخستنی بەرهەمهێنانی نەوت لەناوچەکە هۆشداری دەدات
SNN-
محەمەد باقر قالیباف، سەرۆکی پەرلەمانی ئێران لە هەژماری خۆی لە تۆڕی ئیکس نوسیویەتی، “ترەمپ باسی لەوەدەکرد، کە نرخی نەوت بەرزنابێتەوە و ئێستاش کە بەرزبووەتەوە، دەڵێت بەم نزیکانە دادەبەزێتەوە.”
راشیگەیاند، ئەگەر شەڕەکە بەم جۆرە بەردەوام بێت، نە رێگەیەک بۆ فرۆشتنی نەوت دەمێنێتەوە و نە توانایەک بۆ بەرهەمهێنانیشی.
سەرۆکی پەرلەمانی ئێران ئاماژەی بەوەشکردووە، ترەمپ نەک هەر بەرژەوەندییەکانی ئەمریکا، بەڵکوو بەرژەوەندی وڵاتانی ناوچەکەش دەکاتە قوربانی خەیاڵەکانی نەتانیاهو.
ئەمەش لە کاتێکدایە، لە دوای دەستپێکردنی هێرشەکانی ئەمریکا و ئیسرائیل بۆ سەر ئێران نرخی نەوت لەماوەی هەفتەیەکدا بە رێژەی نزیکەی 28٪ بەرزبووەتەوە و ئەمڕۆ یەک بەرمیل نەوتی برێنت بە زیاتر لە 93 دۆلار مامەڵەی پێوەدەکرێت.
