دارایی عێراق: کورتهێنانی ساڵی 2025 گەیشتووەتە زیاتر لە 17 تریلیۆن دینار

وەزارەتی دارایی فیدراڵ ڕاپۆرتی کۆتایی خەرجی و داهاتی ساڵی 2025ی بڵاوکردەوە، کە تێیدا دەرکەوتووە داهاتی نەوت بە شێوەیەکی بەرچاو کەمی کردووە و کورتهێنانی بودجەش بەراورد بە ساڵی پێشوو نزیکەی دوو هێندە زیادی کردووە.

خەرجییە گشتییەکانی ساڵی 2025

بەگوێرەی ڕاپۆرتەکەی وەزارەتی دارایی، کۆی خەرجیی گشتیی عێراق لە ساڵی 2025دا گەیشتووەتە 141,227,925,207,252 دینار. خەرجییەکان بەم شێوەیە دابەش بوون:

خەرجیی بەکاربردن: 119,163,668,159,155 دینار.

خەرجیی وەبەرهێنان: 22,064,257,048,000 دینار، کە دەکاتە 15.6%ی کۆی خەرجییەکان.

بەراورد بە ساڵی 2024، خەرجیی گشتیی عێراق بە بڕی 9.2 تریلیۆن دینار کەمی کردووە.

داهاتی نەوتی و نانەوتی

کۆی داهاتی عێراق لە ساڵی 2025دا گەیشتووەتە 124,185,235,754,307 دینار، کە بەم شێوەیە پۆلێن کراوە:

داهاتی نەوت: 109,207,744,884,692 دینار (88%ی تێکڕای داهات).

داهاتی نانەوتی: 14,977,490,869,615 دینار (12%ی تێکڕای داهات).

بەراورد بە ساڵی 2024، داهاتی گشتی 16.5 تریلیۆن دینار کەمی کردووە، کە زۆرترین کەمکردنەکە لە کەرتی نەوتدا بووە بە بڕی 18.3 تریلیۆن دینار، لە بەرامبەردا داهاتی نانەوتی بە بڕی 1.7 تریلیۆن دینار زیادی کردووە.

کورتهێنانی دارایی

ڕاپۆرتەکە ئاشکرای کردووە کە کورتهێنانی نێوان خەرجی و داهاتی عێراق لە ساڵی 2025دا گەیشتووەتە 17.1 تریلیۆن دینار. ئەمە لە کاتێکدایە کە کورتهێنانی ساڵی 2024 تەنیا 9.8 تریلیۆن دینار بووە، ئەمەش نیشانەی زیادبوونی کورتهێنانە بە ڕێژەیەکی بەرچاو.

پشکی هەرێمی کوردستان لە خەرجییەکان

ئەو خەرجییەی لە ساڵی 2025دا لەسەر هەرێمی کوردستان هەژمارکراوە، بڕی 10.7 تریلیۆن دینار بووە، کە زۆربەی هەرە زۆری بۆ دابینکردنی مووچەی فەرمانبەران تەرخانکراوە. بەراورد بە ساڵی 2024، خەرجیی هەژمارکراو لەسەر هەرێمی کوردستان بڕی 368,982,859,011 دینار کەمی کردووە.