دووەم بەهێزترین شەپۆلی بارانبارینی ئەمساڵ هەرێمی کوردستان دەگرێتەوە

SNN – 

دوابەدوای ماوەیەک لە سستی و لاوازبوونی دۆخی کەشوهەوا، جارێکی دیکە تەوژمە هەوایەکی شێدار و بەهێز لە ناوچە کەمەرەییەکان و باشووری زەریای ئەتڵەسییەوە بەرەو ڕۆژهەڵاتی ناوەڕاست هەڵدەکات. ئەم شەپۆلە کە هاوشێوەی “شەپۆلە مێژووییەکەی مانگی 12ی 2025” وەسف دەکرێت، مەترسی لافاو و بارانی توند لەگەڵ خۆی دەهێنێت.

 کات و ماوەی کارکردنی شەپۆلەکە

بەپێی پێشبینییەکان، گۆڕانکارییەکان لە کۆتایی ئەم هەفتەیەوە، ڕێکەوتی 12ی 3ی 2026 دەستپێدەکەن و کاریگەرییەکانی تا 24ی 3ی 2026 بەردەوام دەبن.

 سوپەرسێڵ و تۆرنادۆ؛ هۆشداریی دەدرێت

لە ئەنجامی بەریەککەوتنی هەوای شێدار و گەرم لەگەڵ هەوای ساردی چینە بەرزەکانی ئاسمان، هەوری قەبارە گەورەی (Supercell) دروست دەبن.

• لووتکەی شەپۆلەکە: ڕۆژانی 15 و 16ی مانگ ناجێگیرییەکە دەگاتە ئەوپەڕی و لێزمە بارانی توند و تەرزەی گەورە دەبارێت.

• مەترسییەکان: لە ناوچە گەرمەکان ئەگەری دروستبوونی گەردەلولی (تۆرنادۆ) هەیە.

• پلەی گەرما: پلەکانی گەرما (3 بۆ 5) پلە بەرز دەبنەوە؛ ڕۆژان فێنک و شەوان سارد دەبێت.

 پێشبینی ڕێژەی بارانبارین (12 تا 24ی مانگ)

نەخشەی بارانبارین بەم شێوەیە دابەش دەبێت:

1. سلێمانی، دهۆک، هەولێر، هەڵەبجە، سۆران و ڕاپەڕین: بڕی (150ملم تا زیاتر لە 300 ملم) باران دەبارێت.

2. گەرمیان، کەرکوک و ناوچەکانی عێراق: بڕی (70 ملم تا زیاتر لە 150 ملم) باران دەبارێت.