عەلی حەمە سەعید-SNN
بەهۆی ئەو بارودۆخەی ناوچەكەی گرتووەتەوە ماوەی چەند ڕۆژێك بوو جموجوڵی بازرگانی لەدەروازە سنورییەكانی هەرێمی كوردستان لەگەڵ ئێران ڕاوەستابوو، ئەمەش كاریگەری هەبوو لەسەر گران بووی بەشێك لە پێداویستی ڕۆژانەی هاوڵاتیان، بەڵام لەئێستادا دەروازەی پەروێزخان كراوەتەوە و زیاد لە 300 بارهەڵگر هاتوونەتە هەرێمی كوردستان.
بەگوێرەی زانیارییەكانی SNNدوای ئەوەی هەفتەی ڕابردوو دەروازەی پەروێزخان لەلایەن ئێرانەوە داخرابوو نەدەتواندرا كاڵاو شەمەك هاوردە بكرێت، بەڵام ئەمڕۆ دەروازەكە بەڕووی ئۆتۆمبێلە بارهەڵگرەكاندا كراوەتەوە و لە دوێنێوە تا ئەمڕۆ زیاد لە 300 ئۆتۆمبێلی بارهەڵگر لە دیوی ئێرانەوە هاتوونەتە هەرێمی كوردستان.
ئاماژە بەوەشكراوە، ئەو بارهەڵگرانە بە ڕێگەی ترانزێت هاتوونە ناو هەرێمەوە كە لە وڵاتانی وەك تاجیكستان، ئەرمینیا و وڵاتانی دیكەی ناوچەی قەوقازەوە كاڵایان هێناوە، كە زۆربەیان خۆراك بوون، بەتایبەتیش زۆربەیان برنج بوون.
هەرلە زانیارییەكانی SNNئەوەشهاتووە كە لە ئێستاددا جگە لە دەروازەی پەروێزخان هەریەكە لە دەروازەكانی سەیران بەن و شۆشمێ هاتووچۆی بازرگانی تیایاندا تاڕادەیەكی باش ئاساییە و بازرگانان دەتوانن كاڵاكانیان هاوردە بكەن.
