ترەمپ: ئێران دەیەوێت رێککەوتن بکات بەڵام بەو جۆرە نییە کە من قبوڵمە

SNN-

سەرۆکی ئەمریکا دەڵێت: لە ئێستادا ئێران شکستخواردووە و رێککەوتنی دەوێت، بەڵام ئەو قبوڵی نییە.

دۆناڵد ترەمپ، سەرۆکی ئەمریکا، لە تۆڕی کۆمەڵایەتی “تروس سۆشیاڵ” رایگەیاند، ئێران لە ئێستادا لە رەوشێکی “شکستخواردووی تەواوەتی” دایە، جەختیشی کردەوە، تاران بەهۆی ئەو گورزە کوشندانەی بەریکەوتووە، داوای ئیمزاکردنی رێککەوتن دەکات، بەڵام ئەو ئامادە نییە هیچ رێککەوتنێکیان لەگەڵ بکات.

ئاماژەی بەوەشکردووە، ئێران چیتر خاوەنی بەرگریی ئاسمانی، هێزی ئاسمانی، هێزی دەریایی و سەرکردایەتییەکی یەکگرتوو نییە و سوپاکەی لە لێواری “مانەوە” دایە.

هاوکات ترەمپ، رەخنەی توندی لە میدیاکان گرت و بە “درۆزن” وەسفی کردن، بەو پێیەی نایانەوێت باس لە “سەرکەوتنە مەزنەکانی سوپای ئەمریکا” دژی ئێران بکەن.

سەرۆکی ئەمریکا دەشڵێت، ئێرانییەکان دوای لەدەستدانی هێز و سەرکردەکانیان، داوای دانوستانیان کردووە، بەڵام ئەو وەڵامی داونەتەوە و وتوویەتی: “کات بەسەرچوو، ئێستا زۆر درەنگە”.

ترەمپ پێشتر رایگەیاندبوو کە ئەمریکا تەنها بە “خۆبەدەستەوەدانی بێ مەرجی ئێران” رازی دەبێت.