لەگەڵ بەغدا گەیشتینە ڕێککەوتن بۆ هەناردەکردنی نەوتی کێڵگەکانی کەرکوک لەگەڵ نەوتی هەرێمی کوردستان

SNN

سکرتێری ئەنجوومەنی وەزیرانی هەرێمی کوردستان گەیشتن بە ڕێککەوتنی هەناردەکردنی نەوتی کەرکوک لە ڕێگەی بۆریی هەرێمەوە ڕادەگەیەنێت و جەخت لە پابەندییە یاساییەکانی بەغدا بۆ ناردنی مووچە دەکاتەوە.

ڕێککەوتنی هەناردەکردنی نەوتی کەرکووک
ئامانج ڕەحیم، سکرتێری ئەنجوومەنی وەزیرانی هەرێمی کوردستان و ئەندامی شاندی دانوستانکار ڕایگەیاند، گەیشتوونەتە ڕێککەوتن بۆ هەناردەکردنی نەوتی کێڵگەکانی کەرکوک هاوشان لەگەڵ نەوتی هەرێمی کوردستان. ئەم پرۆسەیە لە ڕێگەی بۆریی گواستنەوەی نەوتی هەرێمی کوردستان – جەیهان ئەنجام دەدرێت.

پابەندییە یاساییەکانی حکومەتی فیدراڵ
سەبارەت بە شایستە داراییەکانی هەرێم، سکرتێری ئەنجوومەنی وەزیران ئاماژەی بەوە کرد کە ئەنجوومەنی نوێنەرانی عێراق بە بڕیارێکی تەشریعی، حکومەتی فیدراڵی بە یاسا پابەند کردووە بە بەردەوامی خەرجکردنی مووچەی مووچەخۆرانی هەرێم. بەپێی ئەم بڕیارە، دەبێت مووچەخۆرانی هەرێم هاوشێوەی مووچەخۆرانی دیکەی عێراق مامەڵەیان لەگەڵ بکرێت و شایستەکانیان بۆ خەرج بکرێت.

کاریگەریی ڕێککەوتنەکە لەسەر داهات و متمانە
ئامانج ڕەحیم ڕایگەیاند، ئەم بەرەوپێشچوونە متمانەی نێوان هەولێر و بەغداد پتەوتر دەکات و ڕەنگدانەوەی شەراکەتی دەستووریی نێوان هەردوو لایەنە. ناوبراو جەختی کردەوە کە ئەم ڕێککەوتنە دەبێتە بنچینەیەکی بەهێز بۆ دابینکردنی بەشێکی گرنگی داهات و لە ئەنجامدا پاڵپشتی بەردەوامی خەرجکردنی مووچەی مووچەخۆرانی هەرێمی کوردستان دەکات.