بارانبارین کۆتایی نەهاتووە… شەپۆلێکی بەهێزی لێزمەباران و تەرزە هەرێمی کوردستان دەگرێتەوە

SNN-

ئاراس جەبار، شارەزای کەشناسی دەڵێت: لە دوانیوەڕۆی ئەمڕۆ شەممەوە 21-3-2026، هەرێمی کوردستان دەکەوێتە ژێر کاریگەریی شەپۆلێکی توندی ناجێگیریی کەشوهەوا، کە مەترسیی دروستبوونی لافاو و بارینی تەرزەی لێدەکرێت.

بارانبارین دەستپیدەکاتەوە

ئاراس جەبار شارەزای کەشناسی بڵاویکردووەتەە کە لە دوانیوەرۆی ئەمڕۆ شەمەوە 21/3/2026 لە زۆربەی ناوچەکانی هەرێمی کوردستان کەش ناجێگیر ئەبێتەوە و هەورە بروسکەی توند و تەرزە و بارانی بەخوڕ دەستپێدەکاتەوە بەتایبەت لەنێوان کاتەکانی عەسر بۆ ئێوارە تاوە بارانەکان بەخوڕتر ئەبن و لەهەندێ شوێندا ئەگەری بارینی تەرزەیەکی زۆریش ئەبێت لەگەڵ بەرزبوونەوەی ئاستی ئاو لە شەقامەکاندا ، بۆ کاتەکانی شەو کاریگەری ئەو ناجێگیریە کەم ئەبێتەوە و هەورە بروسکە و تاوە باران بە رێژەی مامناوەند بەردەوامی ئەبێت .

کەشوهەوای سبەینێ چۆن دەبێت؟

سەبارەت بە کەشی سبەی یەکشەممە 22/3/2026 ئاماژەی بەوەشکردووە کە جارێکی دیکە کاریگەری ئەو ناجێگیریە لەکەش و بەرگەهەوای ناوچەکەدا چالاکتر ئەبێتەوە و شەپۆلێکی بەهێزی هەورە بروسکە و تەرزە و لێزمە باران سەرجەم ناوچەکانمان دەگرێتەوە و تا کاتەکانی شەو کاریگەریەکانی ناوبەناو بەبەهێزی بەردەوامی ئەبێت لەگەڵ چالاکبوونی بای باشوری رۆژهەڵات لەکاتەکانی بەیانی بۆ ئێوارە بەخێرای 20-35کم/ک و لەناوچەکانی سنوری پارێزگای کەرکوک و هەولێر خێرای باکە زیاتر ئەبێت هەندێک کات بۆ زیاتر لە 50کم لە کاتژمێرێکدا.

کاتی شەپۆلە بەهێزەکە

دەشڵێت” بەهێزترین ماوەی دابارینی باران و تەرزە لەناوچەکانی سنوری پارێزگای دهۆک و هەولێر و کەرکوک و نەینەواو لەکاتەکانی نێوان نیوەرۆ بۆ ئێوارە ئەبێت و لەو ماوەیەدا ئەگەری دروستبوونی لافاویش ئەبێت بەتایبەت لە ناوچەکانی سنوری قەزای ئاکرێ و ئامێدی و دەڤەری بادینان و بارزان بەگشتی ، لەناوچەکانی سنوری پارێزگای سلێمانی و هەڵەبجە و ئیدارەی راپەرین و سۆران و گەرمیانیش لە نێوان کاتەکانی ئێوارە بۆ شەو هەورە بروسکە و و بارانی بەخوڕ چالاکتر ئەبێت و لەهەندێ شوێندا ئەگەری دروستبوونی لافاو و بارینی تەرزەیەکی زۆریش ئەبێت.