ترەمپ بۆ ئێران: لە پشت پەردە بۆ ڕێککەوتن دەپاڕێنەوە و کاتتان خەریکە تەواو دەبێت
دۆناڵد ترەمپ
SNN
دۆناڵد ترەمپ، سەرۆکی ئەمریکا لە پەیامێکی بۆ ئێران هێرشی کردە سەر دانوستانکارانی ئێران و ڕایگەیاند، تاران لە ڕووی سەربازییەوە بەتەواوی تێکشکاوە و لە پشت پەردەوە بۆ ڕێککەوتن دەپاڕێنەوە، بەڵام بە ئاشکرا خۆیان بە جدی نیشان نادەن.
“دانوستانکارانی ئێران سەیرن”
دۆناڵد ترەمپ لە نوێترین پەیامیدا سەبارەت بە گفتوگۆکانی نێوان واشنتن و تاران، ڕەفتاری بەرپرسانی ئێرانی بە “سەیر و جیاواز” وەسف کرد. ترەمپ ئاشکرای کرد کە ئێرانییەکان لە کۆبوونەوەکاندا “دەپاڕێنەوە” بۆ ئەوەی ڕێککەوتنێک واژۆ بکەن، بەڵام لە میدیاکاندا بە شێوازێکی دیکە دەردەکەون و دەڵێن تەنیا “سەیری پێشنیازەکەی ئەمریکا دەکەن”.
تاران چانسی هەستانەوەی نییە
سەرۆکی ئەمریکا جەختی لەسەر باڵادەستیی سەربازیی وڵاتەکەی کردەوە و وتی: “پێویستە تاران بپاڕێتەوە، چونکە لە ڕووی سەربازییەوە بەتەواوی لەناوچوون و هیچ چانسێکیان بۆ هەستانەوە نەماوە.” ترەمپ ئاماژەی بەوە کرد کە هەڵەیەکی گەورەیە ئێران کات دەکوژێت و وا نیشان دەدات کە هێشتا بژاردەی دیکەی لەبەردەستە.
“دەرەنجامەکە جوان نابێت”
لە کۆتایی پەیامەکەیدا، ترەمپ دواین هۆشداریی ئاراستەی سەرکردایەتیی ئێران کرد و داوای لێکردن بە زوویی جدی بن. ترەمپ وتی: “پێش ئەوەی زۆر درەنگ بێت ڕێککەوتن بکەن، چونکە کاتێک کاتەکە تەواو بوو، هیچ ڕێگەیەک بۆ گەڕانەوە نامێنێت و دەرەنجامەکەش بۆ ئێران زۆر خراپ دەبێت.”
مۆڵەتەکە بەرەو کۆتایی دەچێت
ئەم لێدوانانەی ترەمپ لە کاتێکدایە کە تەنیا چەند ڕۆژێکی کەم لەو مۆڵەتە ماوە کە ئەمریکا بۆ ڕاگرتنی هێرشەکان و گەیشتن بە ڕێککەوتن دیاری کردووە. واشنتن دەیەوێت لە ڕێگەی ئەم فشارە دیپلۆماسی و سەربازییانەوە، تاران ناچار بکات بە مەرجەکانی ئەمریکا ڕازی ببێت.
