وەزارەتی نەوتی عێراق: داهاتی نەوت لە مانگی شوباتدا زیاتر لە 6 ملیار دۆلار بووە

SNN

وەزارەتی نەوتی عێراق لە راگەیەنراوێکدا ئاشکرایکردووە، لە مانگی شوباتدا زیاتر لە 99 ملیۆن و 872 هەزار بەرمیل نەوت هەناردە كراوە و داهاتی نەوت لەو مانگەدا زیاتر لە 6 ملیار و 814 ملیۆن دۆلار بووە.

ئاماژەی بەوەکردووە، هەوڵەکان بەردەوامن بۆ بەرزکردنەوەی توانای هەناردەکردن بۆ بەندەری جەیهانی تورکیا بۆ 650 هەزار بەرمیل نەوت لە رۆژێکدا.

جەختیکردووەتەوە، بۆرییە سەرەکییەکەی کەرکووک – پیشابوور لە قۆناخی نۆژەنکردنەوەدایە و توانای سەرەتایی گواستنەوەی دەگاتە 350 هەزار بەرمیل لە رۆژێکدا.، هێڵی ستراتیژیی نوێ دەبێتە جێگرەوەیەک بۆ گواستنەوەی نەوتی باشوور بەرەو باکوور لە ئەگەری دروستبوونی کێشە لە تەنگەی هورمز.

لە راگەیەنراوەکەدا ئەوە هاتووە، هاوئاهەنگی لەگەڵ هەرێمی کوردستان هەیە بۆ زیادکردنی توانای بەرهەمهێنان لە کێڵگەکان و ئامانج ئەوەیە هەناردەی هەرێمی کوردستان بگاتە 400 هەزار بەرمیل.

هاوکات، پڕۆژەی هێڵی بەسرە – حەدیسە لە قۆناغی دیزایندایە و دەکرێت لقێکی لێ ببێتەوە بۆ ناو خاکی ئوردن و لقێکی دیکەش بەرەو بانیاس بڕوات.