بەرپرسێکی ئەمریکی بۆ ئەکسیۆس: ئەگەر ئێران ڕێک نەکەوێت، هێزی زەمینی ڕەوانەی قووڵایی خاکەکەی دەکەین

SNN

بەرپرسانی ئەمریکی ئاشکرایان کردووە کە گورزی کۆتایی واشنتن بۆ سەر ئێران تەنیا بۆردومان نابێت، بەڵکو هێرشی زەمینی بۆ قووڵایی خاکی ئەو وڵاتە لەخۆدەگرێت بە مەبەستی دەستبەسەرداگرتنی یۆرانیۆم و کۆنترۆڵکردنی دوورگەی ستراتیژیی خارگ.

هێزی زەمینی بۆ پاراستنی یۆرانیۆم

پێگەی “ئەکسیۆس” لە زاری چەند بەرپرسێکی ئەمریکییەوە بڵاوی کردەوە، پێنتاگۆن پلانی داناوە هێزی زەمینی ڕەوانەی ناو قووڵایی خاکی ئێران بکات. ئامانجی سەرەکیی ئەم هێزە گەیشتنە بەو دامەزراوە ئەتۆمییانەی لە قووڵایی زەویدان و دەستبەسەرداگرتنی یۆرانیۆمە پیتێندراوەکەیە، چونکە تەنیا لە ڕێگەی هێرشی ئاسمانییەوە کۆنترۆڵکردنی ئەو شوێنانە کارێکی زەحمەتە.

وشککردنی سەرچاوەی داهاتی تاران

بەشێکی دیکەی پلانە سەربازییەکەی وەزارەتی بەرگریی ئەمریکا بریتییە لە کۆنترۆڵکردنی دوورگەی “خارگ”. ئەم دوورگەیە گەورەترین ناوەندی هەناردەکردنی نەوتی ئێرانە و نزیکەی 90%ـی نەوتی ئەو وڵاتەی لێوە ڕەوانەی جیهان دەکرێت. کۆنترۆڵکردنی ئەم دوورگەیە وەک گورزێکی کوشندەی ئابووری دەبێت بۆ سەر تاران و سەرچاوەی سەرەکیی داهاتی ئەو وڵاتە وشک دەکات.

مۆڵەتەکەی ترەمپ بەرەو کۆتایی دەچێت

ئەمڕۆ پێنجشەممە 26-03-2026، ئەکسیۆس ئاشکرای کرد کە دۆناڵد ترەمپ هۆشداریی داوە کە جەنگی دژی ئێران بە شێوەیەکی بێپێشینە فراوان دەکات ئەگەر تاران مل بۆ ڕێککەوتن نەدات. ترەمپ تا بەیانیی شەممە 28ـی ئادار، هێرشەکانی سەر ژێرخانی وزەی ئێرانی ڕاگرتووە تاوەکو دەرفەت بداتە دانوستانەکان بۆ گەیشتن بە ڕێککەوتنێکی یەکجاری.

دانوستان لەژێر سێبەری هەڕەشەدا

لە کاتێکدا هەوڵە سەربازییەکان بۆ هێرشی زەمینی ئامادەن، هەوڵە دیپلۆماسییەکانیش چڕبوونەتەوە. چاوەڕێ دەکرێت لە چەند ڕۆژی داهاتوودا گەڕێکی نوێی دانوستان لە نێوان تاران و واشنتن لە وڵاتی پاکستان بەڕێوەبچێت. ئەمریکا دەیەوێت لە ڕێگەی ئەم فشارانەوە، تاران ناچار بکات ڕێککەوتنە 15 خاڵییەکەی واشنتن قبووڵ بکات پێش ئەوەی مۆڵەتەکە تەواو بێت