ئێران وەڵامی داواکارییەکانی ئەمریکای بۆ ڕاگرتنی جەنگ دایەوە

SNN –

ئاژانسی “تەسنیم”ی ئێرانی لە زاری سەرچاوەیەکی ئاگادارەوە بڵاویکردەوە، شەوی ڕابردوو تاران لە ڕێگەی نێوەندگیرەکانەوە وەڵامی فەرمی خۆی سەبارەت بەو 15 خاڵە ڕادەستی ئەمریکا کردووە کە وەک پێشنیاز بۆ هێورکردنەوەی دۆخەکە خرابووە ڕوو، لە ئێستاشدا ئێران چاوەڕێی وەڵامی کۆتایی لایەنی بەرامبەر دەکات.

مەرجەکانی ئێران بۆ ڕاگرتنی شەڕ

بەپێی سەرچاوەکە، وەڵامەکەی ئێران چەند مەرجێکی سەرەکی لەخۆگرتووە کە بریتین لە:

تاران جەختی لە راگرتنی شەڕ و بە ئامانج نەگرتنی بەرپرسانی کردووەتەوە.
ئێران داوای کردووە کە مەرجێکی واقیعی بڕەخسێنرێت بۆ دەستەبەرکردنی دووبارە نەبوونەوەی شەڕ و گەرەنتی پێدانی قەرەبووی زیانەکانی شەڕ.
وەڵامەکەی ئێران جەختی لەوە کردووەتەوە کە کۆتاییهێنان بە شەڕ دەبێت هەموو بەرەکان بگرێتەوە، بە گرووپەکانی بەرگریشەوە.

گەرووی هورمز و گۆڕانکاری لە داواکارییەکان

سەرچاوە ئاگادارەکە جەختی لەوە کردووەتەوە کە “سەروەری ئێران بەسەر گەرووی هورمزدا مافێکی سروشتی و یاساییە” و دەبێت لایەنی بەرامبەر دانی پێدا بنێت. ئاماژەی بەوەش کردووە کە مەرجەکانی ئێران لەم قۆناغەدا گۆڕانکارییان بەسەردا هاتووە و جیاوازن لەو داواکارییانەی لە خولی دووەمی دانوستانەکانی جنێڤ (پێش هێرشەکەی مانگی ئازاری ئەمریکا و ئیسرائیل) خرابوونە ڕوو.

ئامانجە شاراوەکانی ئەمریکا

ئێران پێی وایە بانگەشەکانی ئەمریکا بۆ دانوستان تەنها “فێڵی سێیەم”ە و واشنتۆن لە پشت پەردەی گفتوگۆکانەوە بەدوای ئەم ئامانجانەوەیە:

فریودانی جیهان: نیشاندانی ئەمریکا وەک لایەنێکی ئاشتیخواز کە دەیەوێت شەڕ کۆتایی بێت.

بازاڕی نەوت: هەوڵدان بۆ هێشتنەوەی نرخی نەوت بە نزمی.

ئامادەکاری سەربازی: کڕینی کات بۆ دەستپێکردنی هێرشێکی نوێی زەمینی لە باشووری ئێران.

گومانەکان و ئەزموونی جەنگەکان

سەرچاوەکە دەڵێت، ئەگەر ئێران پێش “جەنگی 12 ڕۆژە” گومانی لە پابەندییەکانی ئەمریکا هەبووبێت، ئێستا گومانی تەواوی هەیە. ئاماژەی بەوەش کردووە کە ئەمریکییەکان هەم لە “جەنگی 12  ڕۆژە” و هەم لە “جەنگی ڕەمەزان”دا، لە کاتی دانوستانەکاندا شەڕیان دەستپێکردووە، بۆیە تاران پێی وایە ئەمجارە لە ژێر پەردەی دانوستاندا زەمینەسازی بۆ “تاوانێکی نوێ” دەکرێت.