وەزارەتی پەروەردە: ڕۆژی یەکشەممە دەوام دەستپێدەکاتەوە و خوێندنی ئۆنلاین بووە ئارەزوومەندانە

SNN-
وەزارەتی پەروەردەی حکومەتی هەرێمی کوردستان بڕیاریدا ڕۆژی یەکشەممە 29-03-2026 دەوام لە تەواوی ناوەندەکانی خوێندن دەستپێبکاتەوە. وەزارەت ئاسانکاریی گەورەی بۆ ئەو دایک و باوکانە کردووە کە نایانەوێت بەهۆی بارودۆخەکەوە منداڵەکانیان بنێرنە ناو قوتابخانە.

خوێندنی ناو پۆل ئیجباری نییە

بەپێی بڕیاری نوێی وەزارەت، هەر بەخێوکەرێک نەیەوێت منداڵەکەی بنێرێتە ناو پۆل، “غیاب”ی بۆ ئەژمار ناکرێت. ئەم قوتابیانە دەتوانن لە ڕێگەی ئۆنلاین و پلاتفۆرمە ئەلیکترۆنییەکانەوە درێژە بە خوێندن بدەن. تەنیا مەرج ئەوەیە کە بەخێوکەرەکە فۆرمێکی تایبەت لە قوتابخانە پڕ بکاتەوە و قوتابییەکەش تەنیا لە کاتی تاقیکردنەوەکاندا بە جەستەیی ئامادە بێت.

قوتابخانە ئەهلی و نێودەوڵەتییەکان

وەزارەتی پەروەردە قوتابخانە نێودەوڵەتییەکانی پابەند کردووە کە دەبێت خوێندنی ئۆنلاین بۆ ئەو قوتابیانە دابین بکەن کە نایانەوێت بێنە ناو پۆل. هەروەها قوتابخانە بیانییەکان سەرپشک کراون کە دەتوانن تەواوی خوێندنەکەیان بکەنە ئۆنلاین، ئەگەر دەستەی کارگێڕیی قوتابخانەکە ئەو بڕیارە بدات.

مژدە بۆ پۆلی 9 و 12ی ئامادەیی

وەزارەت بۆ دڵنیاکردنەوەی قوتابیانی پۆلی 9ی بنەڕەتی و 12ی ئامادەیی ڕایگەیاند، کە ساڵنامەی خوێندن بۆ تاقیکردنەوە نیشتمانی و وەزارییەکان هەموار دەکرێتەوە. ئەمەش بۆ ئەوەیە قوتابیان کاتی پێویستیان هەبێت و بەهۆی پچڕانی دەوامەوە زیانمەند نەبن.

پلاتفۆرمەکانی خوێندنی ئەلیکترۆنی

بۆ ئەوەی خوێندکاران لە ماڵەوە بێبەش نەبن لە وانەکان، وەزارەت دوو پلاتفۆرمی سەرەکیی کارا کردووە:

پلاتفۆرمی ئی-وانە (e-Wane): بۆ هەموو قۆناغەکان لە پۆلی 1 تا 12.

پلاتفۆرمی قوتابخانەکەم (Qutabxanekem): تایبەت بە پۆلی 1 تا 6ی بنەڕەتی.

وەزارەتی پەروەردە جەخت دەکاتەوە کە مامۆستایان لە ڕێگەی گرووپەکانی سۆشیال میدیا و ئەپڵیکەیشنی “ئی-هەڵسەنگاندن”ەوە ئەرکی ماڵەوە و ڕێنماییەکان دەگەیەننە ئەو قوتابیانەی لە ماڵەوە دەخوێنن.