کاتی کۆتاییهاتنی شەپۆلی بارانبارین و جێگیربوونەوەی کەشوهەوا ڕاگەیەندرا

SNN –

کەشناسێکی کورد زانیاری نوێ لەبارەی شەپۆلێکی دیکەی بارانبارین کە هەرێمی کوردستان دەگرێتەوە بڵاودەکاتەوە و کاتی ئاساییبوونەوەی کەشوهەوا و کۆتاییهاتنی بارانبارینیش ئاشکرا دەکات.

کەی شەپۆلە نوێیەکە دەستپێدەکات؟

ئاراس جەبار، شارەزای بواری کەشناسی ڕایگەیاند: “لە ئەنجامی بەردەوامی کاریگەریی نزمەپاڵەپەستۆی دەریای ناوەڕاست، لە نیوەڕۆی سبەینێ یەکشەممە 29-3-2026، شەپۆلێکی نوێی بارانبارین لە سنووری پارێزگای دهۆکەوە دەستپێدەکات و لە کاتەکانی شەودا کاریگەرییەکەی فراوان دەبێت بۆ سەرجەم ناوچەکانی تری هەرێمی کوردستان.”

وردەکاری و بڕی بارانبارین:

بەپێی پێشبینییەکان، شەپۆلەکە تا ئێوارەی ڕۆژی دووشەممە بە چالاکی دەمێنێتەوە و بارانەکە بە شێوەی مامناوەند و پچڕ پچڕ دەبێت، کە لە هەندێک ناوچەدا هەورەبرووسکە و تاوەبارانی بەخوڕی لەگەڵدا دەبێت. زۆرترین بڕی بارانبارین لەم ناوچانە دەبێت:

• پارێزگای دهۆک و دەڤەری بادینان.

• پارێزگای هەولێر و ئیدارەی سۆران و ڕاپەڕین.

• بە پلەی دووەم ناوچەکانی سلێمانی، هەڵەبجە، کەرکووک و باکووری گەرمیان.

کاتی جێگیربوونەوەی کەشوهەوا

ئەو شارەزایەی کەشناسی ئاماژەی بەوەش کردووە، ڕۆژی سێشەممە کاریگەریی شەپۆلەکە بەرەو لاوازی دەچێت، بەڵام بۆ ڕۆژی چوارشەممە کە دەکاتە 1-ی نیسانی 2026، کەشوهەوا لە تەواوی ناوچەکاندا جێگیر دەبێتەوە و ئاسمان دەبێتە ساماڵ، پلەکانی گەرماش لەم ماوەیەدا بە جێگیری دەمێننەوە.