“ترەمپ دواین هۆشداری دەداتە ئێران “یان دانوستان یان جەنگێکی گەورە

SNN –

ئاژانسی ڕۆیتەرز لە زاری بەرپرسێکی باڵای ناو کۆشکی سپییەوە، پەردە لەسەر ستراتیژییە نوێیەکەی دۆناڵد ترەمپ، سەرۆکی ئەمریکا لادەبات بۆ مامەڵەکردن لەگەڵ ئەو گرژییە سەربازییانەی ئێستا لەگەڵ ئێراندا هەیە.

کۆتاییهێنان بە جەنگە بێکۆتاییەکان

بەپێی ڕاپۆرتەکەی ڕۆیتەرز، ترەمپ بە یاریدەدەرەکانی ڕاگەیاندووە کە بە هیچ شێوەیەک نایەوێت ئەمریکا تێوەگلانی جەنگێکی درێژخایەنی دیکەی وەک ئەفغانستان و عێراق بێت. ئامانجی سەرەکی ئەو دوورکەوتنەوەیە لە “جەنگ” و دۆزینەوەی “ڕێگەیەکی دیپلۆماسی و دانوستانە” بۆ کۆتاییهێنان بە ململانێکان.

جەنگێکی چەند هەفتەیی

سەرۆکی ئەمریکا جەختی لەوە کردووەتەوە کە نابێت کردەوە سەربازییەکان بۆ ماوەیەکی درێژ بخایەنن. ترەمپ داوای لە یاریدەدەرەکانی کردووە کە پلانەکان بە جۆرێک بن ماوەی جەنگەکە لە نێوان 4-6 هەفتە تێپەڕ نەکات و لەو ماوەیەدا بگەنە ئەنجامێکی دیاریکراو کە تێیدا ئێران ناچار بە گفتوگۆ بکرێت.

فشاری زۆر و هەڕەشەی توند

ستراتیژییەکەی ترەمپ پشت دەبەستێت بە “فشاری زۆر و هێرشی خێرا” بۆ ئەوەی تاران بێنێتە سەر مێزی گفتوگۆ، نەک چوونی ئەمریکا بۆ ناو جەنگێکی پڕ تێچووی ساڵانە. لە هەمان کاتدا، ترەمپ هۆشدارییەکی توندی داوە و ڕایگەیاندووە: “ئەگەر گفتوگۆکان لەگەڵ ئێران شکستیان هێنا، ئەمریکا پەنا بۆ پەرەپێدانێکی سەربازیی زۆر گەورە دەبات.”