قوباد تاڵەبانی: گروپە لە یاسا دەرچووەکان مەترسین بۆ سەر هەموو عێراق و دەبێت ڕابگیرێن

SNN –
قوباد تاڵەبانی، جێگری سەرۆکی حکومەتی هەرێمی کوردستان، لە پەیامێکی تونددا سەرکۆنەی هێرشەکەی سەر ماڵی نێچیرڤان بارزانی لە دهۆک کرد و هۆشداریی دایە حکومەتی فیدراڵ.

پەرەسەندنێکی مەترسیدار

قوباد تاڵەبانی ڕایگەیاند: “بە ئامانجگرتنی ماڵی بەڕێز کاک نێچیرڤان بارزانی پەرەسەندنێکی مەترسیدارە و زۆر بە توندی ئیدانەی دەکەین.” جەختیشی کردەوە کە ئەم جۆرە کارانە هەڕەشەی ڕاستەوخۆن بۆ سەر ئارامیی ناوچەکە.

پەیام بۆ بەغدا

جێگری سەرۆکی حکومەت حکومەتی فیدراڵی بەئاگا هێنایەوە کە “گروپە چەکدارە لەیاسادەرچووەکان بوونەتە سەرچاوەی هەڕەشە بۆ سەر سەقامگیری و ئاسایشی هەرێمی کوردستان و تەواوی عێراق.”

هۆشداری بۆ داهاتوو

دەشڵێت: “ئەگەر دەستبەجێ ئاژاوەگێڕەکان ڕانەگیرێن و سزا نەدرێن، دڵنیام سبەی دەبنە هەڕەشەیەکی مەترسیدارتر بۆ سەر سەروماڵی بەرپرسان و دامودەزگا فەرمییەکانی بەشەکانی تری عێراق”.