بەڕێوەبەرایەتی کەشناسی: پلەکانی گەرما بەرز دەبنەوە

SNN

کەشناسی هەرێم پێشبینییەکانی بۆ 48 کاتژمێری داهاتوو بڵاوکردەوە و ڕایگەیاند کە شەپۆلی بارانبارین کۆتایی هاتووە، بەڵام ناجێگیرییەکی کەم لە کەشوهەوادا دەمێنێتەوە.

بارودۆخی کەشوهەوا بۆ ئەمڕۆ سێشەممە 31-3-2026

ئاسمانی هەرێمی کوردستان بە گشتی بە هەوری دەمێنێتەوە و هەندێک کات بۆ نیمچە هەور دەگۆڕێت. هەرچەندە شەپۆلی بارانبارین کۆتایی هاتووە، بەڵام ناجێگیرییەکی کەم لە کەشوهەوادا هەیە، بەتایبەت لە ناوچە شاخاوییەکان کە ئەگەری باران و هەورە تریشقە دەکرێت. هەروەها لە دوای نیوەڕۆدا ئەگەری نمە بارانی کورتخایەن لە سەنتەری پارێزگاکانی سلێمانی، دهۆک و هەڵەبجە هەیە. خێرایی با لە نێوان 10 بۆ 15 کم لە کاتژمێرێکدا دەبێت و ئاراستەکەی بەرەو باکووری ڕۆژهەڵاتە، مەودای بینینیش 9 بۆ 10 کم دەبێت.

پێشبینییەکانی کەشوهەوا بۆ سبەی چوارشەممە 1-4-2026

بۆ ڕۆژی چوارشەممە ئاسمانی هەرێم بە گشتی بە نیمچە هەوری دەمێنێتەوە و کەشێکی بەهاری ناوچەکان دەگرێتەوە. ئەگەری نمە باران تەنیا لەسەر ناوچە شاخاوییەکان بەردەوام دەبێت. خێرایی با لەسەرخۆ دەبێت و لە نێوان 10 بۆ 15 کم لە کاتژمێرێکدا دەبێت و ئاراستەکەی بەرەو باکووری ڕۆژئاوا دەگۆڕێت، مەودای بینینیش لە نێوان 8 بۆ 10 کم دەبێت.

ئاستی پلەکانی گەرما لە شار و ناوچە جیاوازەکان

پلەکانی گەرما بەراورد بە ڕۆژانی ڕابردوو کەمێک بەرز دەبنەوە. بۆ ئەمڕۆ سێشەممە بەرزترین پلەکان بەم شێوەیەیە: هەولێر 17، سلێمانی 16، دهۆک 16، هەڵەبجە 19، گەرمیان 21، پیرمام 12، سۆران 13، زاخۆ 16 و حاجی ئۆمەران 6 پلە. بۆ ڕۆژی چوارشەممە پلەکان زیاتر ڕوو لە بەرزبوونەوە دەکەن و بەم شێوەیە دەبن: هەولێر 18، سلێمانی 18، دهۆک 17، هەڵەبجە 19، گەرمیان 22، پیرمام 14، سۆران 15، زاخۆ 18 و حاجی ئۆمەران 8 پلەی سیلیزی.