عەلی حەمە سەعید-SNN
قائیمقامی ناوەندی پارێزگای هەڵەبجە ئاماژە بەوەدەكات، بەمەبەستی سودوەرگرتنی لەو بڕەغازەی كە بەدەستمان دەگات بە شێوەیەكی دادپەروەرانە، دەستمان كردووە بە دابەشكردنی گازی ماڵان لەڕێگەی بریكارەكانی خۆراكەوە، هاوكات بەهۆی وەستانی ناردنی گاز لە كێڵگەی كۆرمۆرەوە، پشكی پارێزگاكە 50٪ كەمی كردووە.
سمكۆ سالار، قائیمقامی ناوەندی پارێزگای هەڵەبجە بە SNNی ڕاگەیاند: بەمەبەستی ئەوەی زۆرترین هاووڵاتی سودمەند ببێت لەو بڕە غازەی كە بۆ پارێزگاكەمان دابیندەكرێت، لە رێگەی پسوولەی خۆراك و لە لایەن بریكارەكانی خۆراكەوە دابەشی دەكەین بەسەر هاووڵاتیاندا، بە جۆرێك هەر خێزانێك ناوی لە پسوولەی خۆراكدا هەبێت، دەتوانێت سەردانی بریكارەكان بكاتب ۆ وەرگرتنی غاز.
ئاماژەی بەوەشكرد، ئێستا 1250 بتڵ غازمان لەڕێگەی بریكارەكانی خۆراكەوە دابەشكردووە، هاوكات پێشتر غازمان لە كەركوك و كارگەی كۆرمۆرەوە بۆ دەهات، بەڵام ئێستا غازی كۆرمۆر وەستاوە و بەو هۆیەوە 50٪ی ئەو بڕە غازەی بۆمان دەهات كەمی كردووە، بۆیە ئەمەش بووەتە هۆی كەمبوونەوەی ڕێژەی غازی ماڵان لە سنورەكەماندا.
قائیمقامی ناوەندی پارێزگای هەڵەبجە ئەوەشی خستەڕوو، بەشێوەیەكی گشتی ئەو غازەی بەدەستمان دەگات دابەشی دەكەین بەسەر هاووڵاتیان و خاوەن پیشەكان بەتایبەت چێشتخانە و نانەواخانەكان، بەجۆرێك لە 20٪ی ئەو غازە بۆ بازاڕ، نانەواخانەكان و كۆمپانیاكانی خۆراك دەبێت، و هەروەها لە 80٪ی دیكەشی بۆ هاووڵاتییانی دابیندەكەین بە نرخی هەشت هەزار و 500 دینار.
