بافڵ جەلال تاڵەبانی و قوباد جەلال تاڵەبانی چۆن هەرێمی کوردستانیان لە جەنگ پاراست؟

SNN

ڕۆژنامەی (تەلەگراف)ـی بەریتانی لە ڕاپۆرتێکی ورددا ئاشکرای دەکات، کە بافڵ جەلال تاڵەبانی و قوباد جەلال تاڵەبانی، ئەو دوو برایەی لە بەریتانیا گەورە بوون، ڕۆڵێکی کەم وێنەیان گێڕا لە دوورخستنەوەی هەرێمی کوردستان لە جەنگی نێوان ئەمریکا و ئێران. ڕۆژنامەکە دەڵێت ئەم دوو برایە نەیانهێشت کورد وەک “سەری ڕم” بۆ هێرشی زەمینی دژی تاران بەکاربهێنرێت.

تەلەفۆنێکی کتوپڕ لە واشنتنەوە
بەپێی ڕاپۆرتەکەی (تەلەگراف)، تەنیا 2 ڕۆژ دوای دەستپێکردنی جەنگی ئەمریکا دژی ئێران، دۆناڵد ترەمپ پەیوەندییەکی تەلەفۆنیی ڕاستەوخۆی لەگەڵ بافڵ جەلال تاڵەبانی ئەنجامدا. ئەم پەیوەندییە بووە هۆی دروستبوونی دەنگۆی ئەوەی کە گوایە ئەمریکا دەیەوێت لە ڕێگەی گرووپە چەکدارە کوردییەکانەوە هێرشی زەمینی بکاتە سەر ئێران، بەڵام بۆچوونی برایانی بافڵ جەلال تاڵەبانی و ووباد تاڵەبانی تەواو جیاواز بوو.

لە پەنابەرییەوە بۆ ناو جەرگەی بڕیار
ڕۆژنامە بەریتانییەکە تیشک دەخاتە سەر پاشخانی ئەم دوو برایە کە وەک پەنابەر لە ناوچەی (کرۆیدۆن)ی بەریتانیا گەورە بوون. ئێستا بافڵ جەلال تاڵەبانی تەمەن (53 ساڵ) سەرۆکی یەکێتیی نیشتمانی کوردستانە و قوباد تاڵەبانی (48 ساڵ) جێگری سەرۆکی حکومەتی هەرێمی کوردستانە. ڕۆژنامەی تەلەگراف دەڵێت ئەم دوو برایە بەهۆی پەروەردە ئەوروپییەکەیان دەتوانن بە زمانێک بدوێن کە هەم ڕۆژئاوا تێیبگات و هەم هاوسەنگی لەگەڵ تاراندا بپارێزن.

دوو کەسایەتیی جیاواز؛ یەک ئامانج
ڕاپۆرتەکە باس لە جیاوازییەکانیان دەکات؛ بافڵ جەلال تاڵەبانی وەک کەسێکی شارەزا لە ستراتیژی سەربازی و “تیژبین” وەسف کراوە کە حەزی بە فەرمیەت نییە، لە بەرامبەردا قوباد تاڵەبانی وەک کەسێکی “ڕێکخراو و کارگێڕ” دەردەکەوێت. ئەم دوو ئاراستەیە وایکردووە بتوانن لە یەک کاتدا لەگەڵ جیهان و ناوخۆی ناوچەکەدا مامەڵەیەکی ورد بکەن.

کوردستان دەبێت “پرد” بێت نەک مەیدانی شەڕ
لە کاتێکدا میدیاکانی ئەمریکا باسیان لە تێوەگلانی (CIA) دەکرد بۆ پڕچەککردنی کوردانی ئێران، بافڵ جەلال تاڵەبانی لە شاشەی (فۆکس نیوز)ەوە پەیامێکی نارد بۆ ترەمپ و وتی: “کوردستان دەبێت پرد بێت، نەک گۆڕەپانی جەنگ.” ئەم پەیامە وەک هەوڵێکی جدی بینرا بۆ ڕێگریکردن لەوەی هەرێم تووشی کارەساتێکی وێرانکەر بێت.

دیپلۆماسی بۆ کۆنترۆڵکردنی چەکدارەکان
(تەلەگراف) ئاماژە بەوە دەکات کە قوباد تاڵەبانی لە چاوپێکەوتنێکدا لەگەڵ (چەناڵ فۆڕ) هۆشداریی دایە گرووپە کوردییەکانی ئێران کە “ژیر و ستراتیژی بن” و بێ ڕەزامەندیی حکومەت هیچ هەنگاوێکی سەربازی نەنێن. ئەم فشارە وایکرد گرووپەکانی وەک (PAK) ڕایبگەیەنن کە ئاسایشی هەرێمی کوردستان ناخەنە مەترسییەوە.

“کورد بەکرێگیراو نییە”
لە بەشێکی توندی ڕاپۆرتەکەدا، قسەکانی شاناز ئیبراهیم ئەحمەد، خانمی یەکەمی عێراق هاتووە کە ڕاشکاوانە بە زلهێزەکانی وتووە: “کورد وەک بەکرێگیراو (Guns for hire) تەماشا مەکەن، ئێمە نابینە پارچەی یارییەکانی ئێوە.” ئەم هەڵوێستە نیشانەی یەکدەنگیی بنەماڵەی تاڵەبانی بوو بۆ دوورخستنەوەی کورد لە “شەڕی وەکالەت”.

ئەنجام: جەنگێک کە هی ئێمە نییە
ڕۆژنامەی تەلەگراف باس لەوە دەکات کە ئێستا گردی دەباشان بووەتە ناوەندێکی گرنگ بۆ پاراستنی سەقامگیری. قوباد تاڵەبانی بە کورتی دەڵێت: “ئەمە جەنگی ئێمە نییە، ئێمە چەندین جەنگمان بینیوە.” بەم شێوەیە ئەم دوو برایە توانییان هەرێمەکەیان لە ناو ئاگری جەنگی ئەمریکا و ئێراندا بە سەلامەتی ڕابگرن.