قەیرانی نەبوونی غاز لەبەرژەوەندی پرۆژەی ڕووناکی دروستکراوە، نانەواکانی هەڵەبجە دووکانەکانیان داخست

عەلی حەمەسەعید-SNN

بەهۆی نەبوون و دابیننەکردنی غاز بۆیان، ئەمڕۆ نانەواخانەکانی هەڵەبجە مانیان لەکارەکانیان گرت و دووکانەکانیان داخست، بەوتەی خاوەن نانەواخانەکانیش ئەم قەیرانە لەبەرژەوەندی پرۆژەی ڕووناکی دروستکراوە.

ئارام محەمەد، خاوەن یەکێک لە نانەواخانەکانی هەڵەبجە بە SNNی ڕاگەیاند:لەسەرتای دەستپێکردنی شەڕی ئێران و ئەمریکا، قەیرانی نەمانی غاز سەریهەڵدا، سەرەتا بەکەمکردنەوەی کارەبای 24کاتژمێری و پاشان دابەشنەکردنی غازی ماڵان، بەبێ ئەوەی هیچ زیانێک بە کێڵگەکانی بەرهەمهێنانی غاز کەوتبێت.

ئاماژەی بەوەشکرد،ئەوەی جێگای سەرسوڕمانە ئەوەیە بۆچی لە بەنزینخانەکان غازی بازرگانی هەیە و بۆ هاووڵاتیان نییە، وەڵامەکەی ئەوەیە بۆ ئەوەی کە پێشتر کاتێک غاز هەبوو هاووڵاتیان لەبری بەکارهێنانی کارەبا پەنایان بۆ غاز دەبرد بە گیزەری غاز ئاویان گەرمدەکرد و زۆربەی کاروبارەکانیان جێبەجێ دەکرد، بەڵام بۆ ئەوەی هاووڵاتیان ناچار بکەن بۆیلەر بەکاربهێنن و ڕوو بکەنە بەکارهێنانی کارەبا بۆ ئەوەی پارەی زۆریان بۆ بێتەوە لەبەرژەوەندی پرۆژەی ڕووناکی ئەم قەیرانەیان دروستکردووە.

ئەو خاوەن نانەواخانەی هەڵەبجە ئەوەشی خستەڕوو، وەک ناڕەزاییەک لەبەرامبەر ئەو قەیرانە دروستکراوە، وەک نانەواکانی هەڵەبجە بڕیارماندا کە دووکانەکانمان دابخەین،چونکە ناتوانین بتڵێک غاز بە25هەزار بکڕین و شەش نان بدەین بەهەزاردینار.