SNN-
ئیدارەی دۆناڵد ترەمپ سەرقاڵی داڕشتنی پلانێکە بۆ کشانەوەی هێزەکانی لەو وڵاتانەی ناتۆ کە لە جەنگی دژ بە ئێراندا هاوکاریی ئەمریکا و ئیسرائیلیان نەکردووە.
پلانی سزادانی وڵاتانی ناتۆ
ڕۆژنامەی “وۆڵ ستریت جۆرناڵ” لە زاری بەرپرسانی ئیدارەی دۆناڵد ترەمپەوە بڵاویکردەوە، ئەمریکا پلانێکی بۆ سزادانی ژمارەیەک وڵاتی ناو هاوپەیمانی ناتۆ ئامادە کردووە. هۆکاری ئەم بڕیارە بۆ هەڵوێستی ئەو وڵاتانە دەگەڕێتەوە لە کاتی ململانێ و جەنگەکەی ئەمدواییەی دژ بە ئێران، کە واشنتن پێی وایە ئەو ئەندامانەی ناتۆ بۆ ئەمریکا و ئیسرائیل بێسوود بوون.
کشانەوە و دووبارە جێگیرکردنەوەی هێزەکان
بەپێی زانیارییەکانی ڕۆژنامەکە، پلانەکە پێشنیاری ئەوە دەکات هێزە ئەمریکییەکان لەو وڵاتانەی ناتۆ بکشێنرێنەوە کە پشتیوانی کارە سەربازییەکانی ئەمریکایان نەکردووە. بڕیار وایە ئەو هێزانە دووبارە لەو وڵاتانەدا جێگیر بکرێنەوە کە بە شێوەیەکی کردەیی پشتیوانی خۆیان بۆ هەڵمەتە سەربازییەکانی ئەمریکا دەربڕیوە.
داخستنی بنکە سەربازییەکان لە ئەوروپا
پلانەکە لە ئێستادا لە قۆناغی سەرەتایی پەرەپێداندایە و لەلایەن بەرپرسانی باڵای ئیدارەی ئەمریکاوە پشتیوانییەکی زۆری لێ دەکرێت. جگە لە گواستنەوەی هێزەکان، ئەگەری داخستنی لانیکەم 1 بنکەی سەربازی گەورەی ئەمریکا لە ئەوروپا هەیە. پێشبینی دەکرێت ئەو بنکەیەی بڕیاری داخستنی دەدرێت، لە وڵاتی ئیسپانیا یان ئەڵمانیا بێت.
گفتوگۆ لەگەڵ مارک ڕووتە
کارۆلاین لڤێت، گوتەبێژی کۆشکی سپی ڕایگەیاند، بڕیارە دۆناڵد ترەمپ گفتوگۆیەکی زۆر ڕاشکاوانە و ڕاستەوخۆ لەگەڵ مارک ڕووتە، سکرتێری گشتیی ناتۆ ئەنجام بدات. ئەم گفتوگۆیە لە چوارچێوەی ئەو ڕەخنانەدایە کە ترەمپ هەمیشە ئاراستەی هاوپەیمانی ناتۆی دەکات سەبارەت بە پابەندیی وڵاتانی ئەندام لە کاتی قەیرانەکاندا.
