SNN-
مەسرور بارزانی، سەرۆکی حکومەتی هەرێمی کوردستان، سەرکۆنەی هێرشەکانی چەند ڕۆژی ڕابردووی سەر هەرێمی کوردستان دەکات و ڕایدەگەیەنێت، سەرەڕای ئەوەی هەرێم بەشێک نییە لەو ململانێیانە، بەڵام کراوەتە ئامانج و بەهۆیەوە پێنج کەس شەهید بوون.
شەهید و بریندار هەن
سەرۆکی حکومەت ئاماژەی بەوە کردووە، کە لە کاتێکدا هەوڵی ئاگربەست و دانوستان دەدرێت، بەڵام هێرشەکان بۆ سەر هەرێمی کوردستان بەردەوامن. بەهۆی ئەم هێرشانەی چەند ڕۆژی ڕابردووشەوە، پێنج کەس شەهید بوون و ژمارەیەکی زۆری دیکەش برینداربوون، ئەمەش نیگەرانییەکی قووڵی لای حکومەتی هەرێم دروستکردووە.
هەوڵێک بۆ تێکدانی ئاگربەست
مەسرور بارزانی دەڵێت: “ئەم هێرشانە تەنها بۆ زیانگەیاندن نییە، بەڵکو هەوڵێکی ئاشکران بۆ تێکدانی ئاگربەست و نانەوەی پشێوی زیاتر لە ناوچەکەدا”. جەختیشیکردەوە کە هەرێمی کوردستان نایەوێت ببێتە بەشێک لەو شەڕە، بەڵام بەردەوامیی هێرشەکان مەترسییەکی گەورەن.
داواکارییەک بۆ بەغدا و جیهان
سەرۆکی حکومەت پەیامێکی ئاراستەی حکومەتی فیدراڵ کرد و داوای لێکردن، ڕێوشوێنی کردەیی و خێرا بگرنەبەر بۆ ڕاگرتنی ئەم هێرشانە. هاوکات داواشی لە هاوبەشە نێودەوڵەتییەکان کرد، هاوکاری هەرێمی کوردستان بن و کەرەستەی پێویست بۆ پاراستنی خەڵک و ژێرخانی وزەی کوردستان دابین بکەن، تاوەکو بتوانرێت ڕووبەڕووی ئەو هەڕەشە بەردەوامانە ببنەوە.
