دۆناڵد ترەمپ، سەرۆکی پێشووى ئەمریکا | فۆتۆ: AP
SNN-
ڕۆژنامەی وۆڵ ستریت جۆرناڵی ئەمریکی لە ڕاپۆرتێکی ورددا پەردە لەسەر پشتپەردەی بڕیارەکانی دۆناڵد ترەمپ، سەرۆکی ئەمریکا لادەدات سەبارەت بە گرژییەکانی لەگەڵ ئێران. بەپێی ڕاپۆرتەکە، ترەمپ سەرەڕای زمانە توند و هەڕەشەئامێزەکەی، لە پشتەوە بە توندی دژی هەر دەستێوەردانێکی سەربازی بووە کە ببێتە هۆی کوژران یان برینداربوونی سەربازانی وڵاتەکەی.
ترسی دووبارەبوونەوەی مێژوو
بەپێی زانیارییەکانی ڕۆژنامەکە کە لە زاری بەرپرسانی باڵای ئیدارەی ئەمریکاوە گواستوویەتییەوە، ترەمپ تووشی جۆرێک لە “ترسی شەخسی” بووە لە دەرکردنی فەرمانی هێرش بۆ سەر ئەو شوێنانەی ئەگەری زیانی گیانییان لێدەکرێت.
سەرچاوەکان ئاماژە بەوە دەدەن کە “شکستی سیاسەتی دەرەوەی جیمی کارتەر” لە ساڵی ١٩٧٩ و قەیرانی بارمتەکان لە ئێران، بە توندی لە مێشکی ترەمپدا ماوەتەوە. ئەو پێی وابووە شکستی کارتەر لە ڕزگارکردنی بارمتەکان و تێکشانی هێلیکۆپتەرەکان بووەتە هۆی دۆڕاندنی لە هەڵبژاردنەکاندا، بۆیە نەیویستووە هەمان سیناریۆ دووبارە ببێتەوە.
ڕەتکردنەوەی کۆنترۆڵکردنی دوورگەی خارک
لە بەشێکی تری ڕاپۆرتەکەدا هاتووە، ترەمپ پێشنیازی فەرماندە سەربازییەکانی بۆ کۆنترۆڵکردنی دوورگەی خارکی ئێران ڕەتکردووەتەوە. سەرەڕای ئەوەی پێی ڕاگەیەندراوە کە ئەرکەکە سەرکەوتوو دەبێت و ئەمریکا دەستی بە تەنگەبەرەکە دەگات، بەڵام ترەمپ وتوویەتی سەربازەکان دەبنە “ئامانجێکی ئاسان” و زیانە گیانییەکان قبوڵنەکراو دەبن.
تووڕەیی لە هاوپەیمانەکان و ناتۆ
ڕۆژنامەکە باس لەوە دەکات کە ترەمپ بێئومێد بووە لەوەی “تەنانەت کەسێک فڕۆکەیەکی بێفڕۆکەوانی هەبێت دەتوانێت ڕێڕەوێکی ئاوی گرنگی وەک هورمز دابخات”. هاوکات تووڕەیی خۆی بەرامبەر هاوپەیمانەکانی دەربڕیوە؛ بە جۆرێک لە کۆبوونەوەکانی کۆشکی سپیدا ڕەخنەی توندی لە کیر ستارمەر، سەرۆک وەزیرانی بەریتانیا گرتووە بەهۆی سستی لە ڕێگەدان بە بەکارهێنانی بنکە سەربازییەکانی ئەو وڵاتە، و گاڵتەشی بە ئیمانوێل ماکرۆن، سەرۆکی فەرەنسا کردووە.
تەکتیکی “سەرۆکی ناجێگیر”
سەبارەت بەو پۆستانەی لە تۆڕە کۆمەڵایەتییەکان بڵاوی دە کردنەوە، بەتایبەت هەڕەشەی “کۆتاییهێنان بە شارستانییەتی ئێران”، بەرپرسانی ئەمریکا دەڵێن:
ئەو لێدوانانە بەشێک نەبوون لە پلانی ئاسایشی نیشتمانی.
ترەمپ بە ئەنقەست زمانێکی “ئیستفزازی و ناجێگیر”ی بەکارهێناوە.
ئامانجی تەنها ترساندنی تاران بووە بۆ ئەوەی ناچار بن بێنە سەر مێزی گفتوگۆ.
یەکێک لە ڕاوێژکارەکانی دەڵێت، ترەمپ تەنانەت هەندێک دەستەواژەی ئایینی وەک “الحمد لله”ی بەکارهێناوە تەنها بۆ ئەوەی وەک کەسێکی “سوکایەتیکەر و پێشبینی نەکراو” دەربکەوێت، چونکە پێی وابووە ئەمە تەنها زمانێکە کە ئێرانییەکان لێی تێدەگەن.
