SNN-
کەشناسیی هەرێمی کوردستان پێشبینییەکانی بۆ 48 کاتژمێری داهاتوو بڵاوکردەوە و ئاماژە بە بارینی نمەباران و گەواڵەبارانی بەهاری لە زۆربەی ناوچەکان دەکات.
بارودۆخی کەشوهەوای ئەمڕۆ شەممە
ئەمڕۆ شەممە 25-04-2026، ئاسمانی هەرێمی کوردستان لە نێوان نیمچەهەور و هەوری تەواودا دەبێت. لە هەندێک کات و شوێندا پێشبینی بارانبارین لە ناوچە شاخاوییەکانی پارێزگای هەولێر، دهۆک و ئیدارەی سۆران دەکرێت کە بە شێوەی نمەباران و گەواڵەبارانی بەهاری دەبێت. خێرایی با لە نێوان 10 بۆ 20 کم/ک دەبێت و مەودای بینین 8 بۆ 9 کیلۆمەترە. پلەکانی گەرما بەراورد بە دوێنێ کەمێک بەرز دەبنەوە، بە شێوەیەک لە هەولێر 25، سلێمانی 25، دهۆک 26، کەرکوک 27، هەڵەبجە 27 و لە گەرمیان 29 پلەی سیلیزی دەبێت.
گۆڕانکارییەکانی کەشوهەوا لە ڕۆژی یەکشەممە
بۆ سبەی یەکشەممە 26-04-2026، ئاسمان بە گشتی بە نیمچەهەوری و هەوری تەواو دەمێنێتەوە. لە کات و شوێنی جیاجیادا پێشبینی نمەباران و بارانی مامناوەند بە شێوەی گەواڵەباران و هەورە تریشقە دەکرێت. ئەم بارانبارینە ناوچەکانی ئیدارەی ڕاپەڕین، سۆران، ناوچە شاخاوییەکان و سەنتەری پارێزگای هەولێر، هەروەها سلێمانی، دهۆک، کەرکوک و ناوچەی گەرمیان بە تایبەتی کەلار و کفری دەگرێتەوە. خێرایی با بۆ 15 بۆ 25 کم/ک زیاد دەکات و مەودای بینین وەک خۆی دەمێنێتەوە.
نزمبوونەوەی پلەکانی گەرما لە ناوچە جیاوازەکان
ڕۆژی یەکشەممە پلەکانی گەرما بە بڕی 2 بۆ 3 پلە بەراورد بە ئەمڕۆ نزم دەبنەوە. بەپێی پێشبینییەکان بەرزترین پلەی گەرما لە هەولێر 22، پیرمام 20، سۆران 18، حاجی ئۆمەران 14، سلێمانی 21، چەمچەماڵ 22، دهۆک 20، زاخۆ 20، هەڵەبجە 23 و لە گەرمیان 27 پلەی سیلیزی دەبێت.
