هۆشداری توند دەدرێت بەو کەسانەی حەجی نایاسایی دەکەن

SNN –

وەزارەتی ئەوقاف و کاروباری ئایینی حکومەتی هەرێمی کوردستان، هۆشدارییەکی توندی ئاراستەی ئەو هاووڵاتییانە کرد کە بەبێ مۆڵەتی فەرمی هەوڵی ئەنجامدانی فەریزەی حەج دەدەن و ڕایگەیاند، هەر کەسێک بە نایاسایی بچێتە خاکی سعودیەوە، ڕووبەڕووی سزای یاسایی توند دەبێتەوە.

نەبەز ئیسماعیل، وتەبێژی وەزارەتی ئەوقاف و کاروباری ئایینی حکومەتی هەرێمی کوردستان لە لێدوانێکدا بۆ SNN ڕایگەیاند: “حکومەتی هەرێمی کوردستان بڕی 4 ملیار دیناری بۆ پشتگیریکردنی پرۆسەی حەجی ئەمساڵ دابین کردووە”.

وتەبێژی وەزارەتی ئەوقاف ئاماژەی بەوەشکرد، ئامانجی سەرەکی لەم بودجەیە و جێبەجێکردنی ڕێکارە نوێیەکان، دابینکردنی سەلامەتی و ئاسوودەیی تەواوە بۆ حاجییان لە کاتی چوون و گەڕانەوەیاندا.

سەبارەت بە ژمارەی حاجییان، نەبەز ئیسماعیل ئەوەی خستەڕوو کە ئەمساڵ 5 هەزار و 120 کەس بە شێوەی فەرمی گەشتی حەج دەکەن.

لەبارەی ئەوانەی دەیانەوێت بە ڕێگەی نایاسایی گەشت بکەن، وتەبێژی وەزارەتی ئەوقاف هۆشدارییەکی توندی دایە هاووڵاتییان و جەختی کردەوە: “ئەو کەسانەی بە نایاسایی دەچنە ناو خاکی سعودیەوە، لە لایەن دەسەڵاتدارانی ئەو وڵاتەوە ڕووبەڕووی سزای یاسایی توند دەبنەوە و پێویستە هەمووان پابەندی ڕێنماییە فەرمییەکان بن”.