بافڵ جەلال تاڵەبانی: کرێکاران سامانێکی نیشتمانیی بێوێنەن و داکۆکیکاری مافەکانیان دەبین

SNN-

سەرۆکی یەکێتیی نیشتمانیی کوردستان بەبۆنەی ڕۆژی جیهانیی کرێکارانەوە پەیامێکی بڵاوکردەوە و تێیدا جەخت لەسەر پاراستنی شکۆ و دابینکردنی ژیانێکی شایستە بۆ کرێکاران دەکاتەوە و دەڵێت، ئەوان بزوێنەری سەرەکیی گەشەپێدانی نیشتمانن.

بزوێنەری سەرەکیی گەشەپێدان

بافڵ جەلال تاڵەبانی، سەرۆکی یەکێتیی نیشتمانیی کوردستان، بەبۆنەی 1ی ئایار، ڕۆژی جیهانیی کرێکاران، گەرمترین پیرۆزبایی ئاراستەی سەرجەم کرێکارانی کوردستان، عێراق و جیهان دەکات. ئاماژە بەوە دەکات کە بە ڕێز و پێزانینێکی زۆرەوە لە دەستە ماندووەکانیان دەڕوانێت، چونکە ئەوان بزوێنەری سەرەکیی گەشەپێدانی نیشتمانن.

سامانێکی نیشتمانیی بێوێنە

لە پەیامەکەیدا سەرۆکی یەکێتی دەڵێت: “کرێکاران تەنها هێزی کار نین، بەڵکو سامانێکی نیشتمانیی گەورە و بێوێنەن”. باسی لەوەش کردووە کە بەبێ کۆشش و عارەقی ناوچەوانی ئەوان، هیچ وڵاتێک بەرەو پێشەوە هەنگاو نانێت، بۆیە کاری لەپێشینەیان دابینکردنی ژیانێکی شایستە و پاراستنی شکۆ و مافە یاساییەکانیانە.

داکۆکیکردن لە مافی کرێکاران

بافڵ جەلال تاڵەبانی دووپاتی دەکاتەوە کە وەک هەمیشە پاڵپشت و داکۆکیکاری مافی کرێکاران دەبن. جەختیش دەکاتەوە کە پابەندن بە هەوڵەکانیان بۆ دەستەبەرکردنی ژینگەیەکی کاری تەندروست و سەردەمیانە، کە تێیدا دادپەروەریی کۆمەڵایەتی فەراهەم بکرێت و مافەکانیان پێشێل نەکرێت