لە سلێمانی دڵنیایی دەدرێت كە نرخی سەوزە و میوە گران نابێت و زیاتریش دادەبەزێت

عەلی حەمە سەعید-SNN

وتەبێژی عەلوەكەی سلێمانی ئاماژەبەوەدەكات، بەهۆی زیادبوونی بەرهەمی ناوخۆ، نرخی سەوزەو میوەكان بە شێوەیەكی بەرچاو دابەزیون، هاوكات هاوردەكردنی سەوزەو میوەش لەدەرەوە هیچ گرفتێكی نییە و نرخەكان زیاتریش دادەبەزن.

سەروەر عەلی، وتەبێژی عەلوەی سەوزە و میوەی سلێمانی بە SNNی ڕاگەیاند:دابەزینی نرخی سەوزەو میوەكان لە عەلوەی سلێمانی بەردەوامی هەیە بەتایبەت ئەو سەوزە و میوانەی كە پێداویستی سەرەكی ڕۆژانەی هاووڵاتیانن بەتایبەت بەرهەمی تەماتە كە بەرارود بە هەفتەی پێشوو هەر كیلۆیەك بڕی 750 دینار هەرزانتر بووە.

ئاماژەی بەوەشكرد، هەرزانبوونی سەوزە و میوە بەشێكی  بۆ ئەوە دەگەڕێتەوە بەرهەمی خۆماڵی زیادیكردووە، هەموو ئەو بەرهەمانەی لە ئێرانەوە دەمانهێنا ئێستا لەناوخۆ هەیە، هاوكات هاوردەكردنی بەرهەمی دەرەكیش لە سنورەكانەوە هیچ گرفتێكیان نییە و بەگوێرەی پێداویستی ناوخۆ هاوردە دەكرێن.

وتەبێژی عەلوەی سلێمانی ئەوەشی خستەڕوو، تەنها یەك بۆ دوو ڕۆ ژلە سنورەكانەوە گرفتی هاوردەكردنی سەروزە و میوەمان هەبووە ئەویش سەرەتای دەستپێكردنی جەنگەكە بوو، بەڵام لەئێستادا هیچ گرفتێكی هاتنی سەوزەو میوەمان نیە كە لە ئێرانەوە هاوردەی هەرێمی كوردستان دەكرێت.