لۆگۆى یەکێتیی نیشتمانیی کوردستان | فۆتۆ: SNN
SNN-
عەلی حەمە سەعید-SNN
گفتوگۆكانی پێكهێنانی كابینەی نوێی حكومەتی عێراقی بەرەو كۆتایی دەچن و وابڕیارە هەفتەی داهاتوو لە پەرلەمان متمانە بە كابینەی نوێی حكومەت بدرێت، هاوكات پشك و بەركەوتەی كوردیش چوار وەزارەتی سەرەكی دەبێت و یەكێتی نشتیمانی كوردستانیش دوو وەزارەت وەردەگرێت.
بەگوێرەی ئەو زانیارییانەی كە لە بەرپرسانی كورد لە بەغداوە بە SNNدراون ئەوە خراوەتەڕوو، لە كۆی 21 وەزارەتی كابینەكەی عەلی زەیدی 11 وەزارەت بۆ لایەنی شیعەكان و شەش وەزارەت بۆ لایەنی سونەكان و چوار وەزارەتیش بۆ كورد دیاریكراون.
ئاماژەی بەوەشكرد، ئەو چوار وەزارەتەی وەك پشكی كورد دیاریكراون بەلایەنی كەم یەكێكیان وەزارەتێكی سیادی دەبێت وەك وەزارەتی دەرەوە یاخود دارایی، هاوكات سێ وەزارەتی دیكەش خزمەتگوزاری دەبن، جگە لەو چوار وەزارەتەش چەندین بریكاری وەزارەت بەرپشكی كورد دەكەوێت كە دواتر ئەوانەش دابەشدەكرێن بە گوێرەی بەركەوتەی هەڵبژاردن و ژمارەی كورسی لایەنە بەشدارەكانی حكومەت.
هەر لە زانیارییەكانی SNN ئەوەشهاتووە كە لەكۆی ئەو چوار وەزارەتە سەرەكییەی بۆ كورد دانراون، دوو وەزارەتیان بۆ یەكێتی نشتیمانی كوردستان دەبێت، كە لە ئێستادا گفتوگۆكان بەو ئاراستیەن كە وەزارەتە سیادییەكەش لای یەكێتی نشتیمانی كوردستان بێت و وەزارەتێكی خزمەتگوزاریش بەڕێوە ببات.
