کارنامەی کابینەکەی عەلی زەیدی بڵاوکرایەوە

SNN –

عەلی فالح زەیدی، سەرۆکوەزیرانی ڕاسپێردراوی عێراق، لە هەنگاوێکی فەرمیدا کارنامەی کابینە نوێیەکەی ڕادەستی سەرۆکایەتی پەرلەمان کرد. کارنامەکە کە لە 13 لاپەڕە و 14 بەند پێکهاتووە، ستراتیژی حکومەت بۆ قۆناغی داهاتوو لە بوارەکانی ئەمنی، سیاسی، ئابووری و پەیوەندییە نێودەوڵەتییەکان ڕوون دەکاتەوە.

دۆسیەی ئەمنی: چەک تەنیا لە دەستی دەوڵەتدا دەبێت

یەکێک لە خاڵە هەرە جەوهەرییەکانی کارنامەکەی زەیدی، چەسپاندنی سەروەریی یاسایە لە ڕێگەی سنووردارکردنی چەک لە دەستی دەوڵەتدا. هاوکات، پلانەکە جەخت لە پەرەپێدانی توانا سەربازییەکانی حەشدی شەعبی و بەهێزکردنی ئاسایشی سنوورەکان دەکاتەوە، ئەوەش لە ڕێگەی بەکارهێنانی سیستمی چاودێریی پێشکەوتوو و تەکنەلۆژیای سەربازیی هاوچەرخ.

سیاسەتی دەرەوە: عێراق لە ململانێکان دوور دەخرێتەوە

سەرۆکوەزیرانی ڕاسپێردراو بەڵێنی داوە عێراق لە هەموو ململانێیەکی ناوچەیی و نێودەوڵەتی دوور بخاتەوە و پەیڕەوی سیاسەتی هاوسەنگی بکات. لە کارنامەکەدا هاتووە کە ڕێگە نادرێت خاکی عێراق بۆ هێرشکردنە سەر وڵاتانی دراوسێ بەکاربهێنرێت، هەروەک چۆن ڕێگری لە هەر جۆرە دەستوەردانێکی دەرەکی لە کاروباری ناوخۆی وڵات و پێشێلکردنی سەروەریی خاکی عێراق دەگیرێت.

پەیوەندییەکان: چالاککردنی ڕێککەوتنی ستراتیجی لەگەڵ ئەمریکا

لە بەشێکی دیکەی کارنامەکەدا، ئاماژە بە چالاککردنی “ڕێککەوتنی چوارچێوەی ستراتیجی” لەگەڵ ویلایەتە یەکگرتووەکانی ئەمریکا کراوە. زەیدی ئامانجیەتی پێگەی پاسپۆرتی عێراقی لەسەر ئاستی جیهان بەهێز بکات و پەیوەندییە دیپلۆماسییەکان لەگەڵ وڵاتانی عەرەبی و دراوسێ پەرە پێ بدات.

ئابووری: دامەزراندنی “سندوقی نەوەکان” و پاراستنی وەبەرهێنان

لە ڕووی ئابوورییەوە، پڕۆژەی دروستکردنی “سندوقی نەوەکان” وەک هەنگاوێک بۆ پارێزگاریکردن لە مافی نەوەکانی داهاتوو لە سامانی نەوتدا پێشنیار کراوە. هەروەها حکومەتی نوێ بەڵێنی دابینکردنی ژینگەیەکی ئارام بۆ کۆمپانیا بیانییەکان و کۆمپانیا زەبەلاحەکانی نەوت دەدات، شانبەشانی فراوانکردنی وەبەرهێنان لە کەرتی کانزاکان و سامانە سرووشتییەکاندا.

مافی مرۆڤ و ئازادییەکان

کارنامەکەی عەلی فالح زەیدی بایەخێکی تایبەتی بە چەسپاندنی بنەماکانی مافی مرۆڤ و پاراستنی ئازادیی ڕادەربڕین داوە. بەپێی بەڵێنەکانی، ژینگەیەکی لەبار و پارێزراو بۆ کارکردنی میدیاکاران، ڕۆژنامەنووسان و چالاکوانانی مەدەنی دەڕەخسێنرێت بۆ ئەوەی دوور لە فشارەکان کارەکانیان ئەنجام بدەن.